1 हे यहोवा, दाऊद खात्तर उसकी सारी बुरी हालत नै याद कर;

2 उसनै यहोवा तै कसम खाई,

अर याकूब के सर्वशक्तिमान की मन्‍नत मान्‍नी सै,

3 उसनै कह्या "पक्‍का मै उस बखत तक अपणे घर म्ह न्ही जाऊँगा,

अर ना अपणे पलंग पै चढूंगा;

4 ना अपणी आँख मै नींद,

अर ना अपणी पलकां म्ह झपकी आण दियुँगा,

5 जिब ताहीं मै यहोवा खात्तर एक जगहां,

यानिके याकूब के सर्वशक्तिमान खात्तर रहण की जगहां ना बणाऊँ।"

6 देक्खो, हमनै एप्राता म्ह इसकी चर्चा सुणी सै,

हमनै इन ताहीं बण के खेत्तां म्ह पाया सै।

7 आओ, हम उसके रहण की जगहां म्ह जावै,

हम उसके पैरां की चौकी कै आग्गै दण्डवत करां।

8 हे यहोवा उठकै अपणे अाराम की जगहां म्ह

अपणे सामर्थ्य के सन्दूक समेत आ।

9 तेरे याजक धर्म के कपड़े पहरे रह,

अर तेरे भगत माणस जयजयकार करै।

10 अपणे दास दाऊद खात्तर

अपणे अभिषिक्त की प्रार्थना नै अनसुणी ना कर।

11 यहोवा नै दाऊद तै सच्‍ची कसम खाई सै अर वो उसतै न्ही मुकरैगा:

"मै तेरी गद्दी पै तेरे एक खास बेट्टे नै बिठाऊँगा।

12 जै तेरे खानदान के लोग मेरे हुकमां नै मान्या करैं

अर जो चितौनी मै उननै सिखाऊँगा, उसपै चाल्‍लै,

तो उनके खानदान के लोग भी तेरी गद्दी पै युग-युग बैठदे रहवैगें।"

13 क्यूँके यहोवा नै सिय्योन ताहीं चुण्या सै,

अर उसनै अपणे रहण खात्तर चाह्या सै।

14 "या तो युग-युग खात्तर मेरे अाराम की जगहां सै;

आड़ै मै रहूँगा, क्यूँके मन्‍नै इस ताहीं चाह्या सै।

15 मै इस म्ह खाण-पीण की चिज्जां पै घणी आशीष दियुँगा;

अर इसके भूख्यां नै रोट्टी तै छिकाऊँगा।

16 इसके याजकां नै मै उद्धार के कपड़े पिराऊँगा,

अर इसके भगत माणस ऊँच्‍ची आवाज म्ह जयजयकार करैगें।

17 ओड़ै मै दाऊद की पीढियाँ नै महान राजा बणा दियुँगा

अर याड़ै मै चुणे होया के राज्य की रुखाळी करुँगा;*

18 मै उसके दुश्मनां नै शर्मिन्दा कर दियुँगा,

पर उसका राज्य बण्या रहवैगा।"*