1 हे परमेसवर, तू मेरा परमेसवर सै,

मै तेरे ताहीं लगन तै ढूँढ़ूगा;

सूक्खी अर निर्जल बंजर धरती पै,

मेरा मन तेरा तिसाया सै, मेरी देह तेरी घणी इच्छा करै सै।

2 इस तरियां तै मन्‍नै पवित्र स्‍थान म्ह तेरे पै निगांह करी,

ताके तेरी सामर्थ्य अर महिमा नै देक्खूँ।

3 क्यूँके तेरी करुणा जीवन तै भी आच्छी सै,

मै तेरी बड़ाई करुँगा।

4 इस तरियां मै जीवन भर तेरे ताहीं धन्य कहन्दा रहूँगा;

अर तेरा नाम लेकै अपणे हाथ ठाऊँगा।

5 मेरा जी मान्‍नो चर्बी अर चिकणे खाणे तै छिक्या हो,

अर मै जयजयकार करकै तेरी बड़ाई करुँगा।

6 जब मै बिछोणे पै पड्या तन्‍नै याद करुँगा,

तब रात के एक-एक पहर म्ह तेरे पै ध्यान करुँगा;

7 क्यूँके तू मेरा मददगार बण्या सै,

इस करकै मै तेरे पंखां की छाया म्ह जयजयकार करुँगा।

8 मेरा मन तेरे पाच्छै-पाच्छै लाग्या सै;

अर मेरे ताहीं तो तू अपणे सोळे हाथ तै थाम्मे रहवै सै।

9 पर जो मेरी जान के दुश्मन सै,

वो धरती की निचली जगहां म्ह जा पड़ैगें;

10 वे तलवार तै मारे जावैंगे,

अर गादड़ां का खाणा हो जावैंगे।

11 पर राजा परमेसवर कै कारण खुश होवैगा;

जो कोए परमेसवर की कसम खावै, वो बड़ाई करण पावैगा;

पर झूठ बोलण आळे का मुँह बन्‍द करया जावैगा।