भजन संहिता 60

छुटकारै खात्तर प्रार्थना

प्रधान बजाण आळे खात्तर दाऊद का मिक्ताम शूशनेदूत राग म्ह। शिक्षादायक। जिब वो अरम्नहरैम अर अरमसोबा तै लड़ै था। अर योआब नै बोहड़कै नमक की तराई म्ह एदोमियां म्ह तै बारहा हजार माणस मार लिये

1 हे परमेसवर तन्‍नै मेरे ताहीं त्याग दिया,

अर म्हारै ताहीं तोड़ दिया सै;

तू छो म्ह आया, फेर म्हारै ताहीं ज्यों का त्यों करदे।

2 तन्‍नै धरती ताहीं कंपया अर पाड़ दिया सै;

उसके दरारां नै भर दे, क्यूँके वो डगमगावै सै।

3 तन्‍नै अपणी प्रजा ताहीं मुश्किल बखत दिखाया;

तन्‍नै म्हारे ताहीं लड़खडाण आळा दाखमधु पिलाया सै।

4 तन्‍नै अपणे भय मानण आळा ताहीं झण्डा दिया सै,

ताके वो सच्‍चाई के कारण*60:4 सच्‍चाई के कारण धनुष तै फैहराया जावै। (सेला)

5 तू अपणे सोळे हाथ तै बचा, अर म्हारी सुण ले

ताके तेरे प्रिय छुड़ाए जावै।

6 परमेसवर पवित्र जगहां*60:6 पवित्र जगहां पवित्रता के गैल म्ह तै बोल्या सै, "मै फूल्‍ला न्ही समाऊँगा;

मै शेकेम नै बाँट ल्यूँगा, अर सुक्‍कोत की तराई नै नपवाऊँगा।

7 गिलाद मेरा सै; मनश्‍शे भी मेरा सै;

अर एप्रैम मेरे सिर का टोप,

यहूदा मेरा राजदण्ड सै।

8 मोआब मेरे धोण का पात्र सै;

मै एदोम पै अपणा जूत्ता फेंक्‍कूँगा;

हे पलिश्‍तीन, मन्‍नै उस ताहीं जीत लिया सै अर मै खुशी तै चिल्‍लाऊ सूं।"

9 मन्‍नै गढ़आळे नगर म्ह कौण पोहचावैगा?

एदोम तक मेरी अगुवाई किसनै करी सै?

10 हे परमेसवर, के तन्‍नै म्हारे ताहीं त्याग न्ही दिया?

हे परमेसवर, तू म्हारी सेना की गैल न्ही जान्दा।

11 दुश्मन के खिलाफ म्हारी मदद कर,

क्यूँके माणस की करी होई मदद बेकार सै।

12 परमेसवर की मदद तै हम वीरता दिखावागें,

क्यूँके म्हारे दुश्मनां नै वोए रौंदैगा।