परमेसवर धर्मी न्यायाधीश
आसाप का भजन
1 सर्वशक्तिमान परमेसवर यहोवा नै कह्या सै,
अर उदयाचल तै लेकै अस्ताचल तक धरती
के माणसां ताहीं बुलाया सै।
2 सिय्योन तै जो परम सुन्दर सै,
परमेसवर नै अपणा तेज दिखाया सै।
3 म्हारा परमेसवर आवैगा अर वो चुप न्ही रह्वैगा,
आग उसकै आग्गै-आग्गै भस्म करदी जावैगी;
अर उसकै चारु ओड़ बड़ी आँधी चाल्लैगी।
4 वो अपणी प्रजा का न्याय करण खात्तर
उप्पर के अकास नै अर धरती नै भी पुकारैगा;
5 "मेरे भगतां ताहीं मेरै धोरै कठ्ठा करो,
जिननै बलिदान चढ़ाकै मेरै तै करार करया सै!"
6 अर सुर्ग उसके धर्मी होण का प्रचार करैगा
क्यूँके परमेसवर तो आप ए न्यायी सै। (सेला)
7 "हे मेरी प्रजा, सुण, मै बोल्लू सूं,
अर हे इस्राएल, मै तेरे बारें म्ह गवाही देऊँ सूं।
परमेसवर तेरा परमेसवर मै ए सूं।
8 मै तेरे पै तेरे मेलबलियां कै बारें म्ह दोष कोन्या लगान्दा,
तेरे होमबलि तो सदा मेरै खात्तर चढ़ै सै।
9 मै ना तो तेरे घर तै बळध
ना तेरे बाड़े तै तेरे बकरे ल्यूँगा।
10 क्यूँके बण के सारे जीव-जन्तु
अर हजारों पहाड़ी जानवर मेरे ए तो सै।
11 पहाड़ां50:11 पहाड़ां आसमान के सारे पंछियाँ नै मै जाणु सूं,
अर मैदानां म्ह चाल्लण-फिरण आळे जानवर मेरे ए तो सै।
12 जै मै भूक्खा होंदा तो तेरे तै न्ही कहन्दा;
क्यूँके दुनिया अर उस म्ह जो कुछ सै वो मेरा सै।
13 के मै बळध का माँस खाऊँ,
या बकरयां का लहू पीऊँ?
14 परमेसवर नै धन्यवाद की ए भेंट चढ़ा,
अर परमप्रधान खात्तर अपणी मन्नत पूरी कर;
15 अर संकट कै दिन मन्नै पुकार;
मै तन्नै छुड़ाऊँगा, अर तू मेरी महिमा करण पावैगा।"
16 पर दुष्ट तै परमेसवर कहवै सै:
"तन्नै मेरी विधियाँ का जिक्र करण तै के काम?
तू मेरी वाचा की जिक्र क्यूँ करै सै?
17 तू तो शिक्षा तै बैर करै सै,
अर मेरे वचनां नै तुच्छ जाणै सै।
18 जद तन्नै चोर कान्ही देख्या, तो तू उसकी संगत तै खुश होया;
अर उनकै गैल जारी म्ह भाग्गी होया।
19 तन्नै अपणा मुँह बुराई करण खात्तर खोल्या,
अर तेरी जीभ धोक्खे की बात गढ़ै सै।
20 तू बैठा होया अपणे भाई कै बिरुध्द बोल्लै;
अर अपणे सगे भाई की बुराई करै सै।
21 यो काम तन्नै करया, अर मै चुप रह्या;
इस करकै तन्नै समझ लिया के परमेसवर बिल्कुल मेरी तरियां सै।
पर मै तन्नै समझाऊँगा, अर तेरी आँखां कै
स्याम्ही सब कुछ न्यारा-न्यारा दिखाऊँगा।
22 हे परमेसवर नै भूल्लण आळेयो या बात भली-भाँति समझ ल्यो,
कदे इसा ना हो के मै थमनै टुकड़े-टुकड़े कर देऊँ,
अर थारा कोए भी छुड़ाण आळा ना रहवै!
23 धन्यवाद की भेंट चढ़ाण आळा मेरी महिमा करै सै;
अर जो अपणा चरित्र बढ़िया राक्खै सै;
मै उसनै परमेसवर का करया होया उद्धार दिखाऊँगा!"