1 यहोवा का धन्यवाद करणा भला सै,

हे परमप्रधान, तेरे नाम का भजन गाणा;

2 सबेरै कै बखत तेरी करुणा

अर रोज रात तेरी सच्‍चाई का प्रचार करणा,

3 दस तारआळे बाजे अर सारंगी पै,

अर वीणा पै गम्भीर स्वर तै गाणा भला सै।

4 क्यूँके, हे यहोवा, तन्‍नै मेरे ताहीं अपणे काम्मां तै खुश करया सै;

अर मै तेरे हाथ्थां के काम्मां कै कारण तेरी जयजयकार करुँगा।

5 हे यहोवा, तेरे काम कितणे बड़े सै!

तेरी योजना घणी गम्भीर सै;

6 पशु बरगा माणस इस ताहीं न्ही समझदा,

अर मूर्ख इसका विचार न्ही करदा:

7 के दुष्ट जो घास की तरियां फूल्‍लै-फळै सै,

अर सारे गलत करणीये जो घणे राज्जी होवै सै,

यो इस करकै होवै सै, के वो सदा खात्तर नाश हो ज्या,

8 पर हे यहोवा, तू सदा विराजमान रहवैगा।

9 क्यूँके हे यहोवा, तेरे दुश्मन, हाँ तेरे दुश्मन नाश होंगे;

सब गलत करणीये तित्तर-बितर होवैगें।

10 पर मेरा सींग* तन्‍नै जंगळी सांड की तरियां ऊँच्‍चा करया सै;

तन्‍नै ताजे तेल तै मेरा अभिषेक करया सै*।

11 मै अपणे दुश्मनां पै निगांह करकै,

अर उन कुकर्मियाँ का हाल जो मेरै खिलाफ उठ्ठे थे, सुणकै संतुष्ट होया सूं।

12 धर्मी माणस खजूर की तरियां फूल्‍लै-फळगें,

अर लबानोन के देवदार की तरियां बढ़दे रहवैंगे।

13 वे यहोवा के भवन म्ह बोए जाकै

म्हारे परमेसवर के आँगणां म्ह फूल्‍लै-फळगें।

14 वो पुराणे होण पै भी फळदे रहवैगें,

अर रस भरे अर लहरान्दे रहवैंगे,

15 जिसतै या बात जाहिर हो, के यहोवा सच्‍चा सै;

वो मेरी चट्टान सै, अर उस म्ह कुछ भी बुराई कोनी।