भजन संहिता 59

सलामती खात्तर प्रार्थना

प्रधान बजाण आळे खात्तर अल-तशहेत राग म्ह दाऊद का मिक्ताम; जिब शाऊल के भेज्जे होए माणसां नै घर का पैहरा दिया ताके उस ताहीं मारदे

1 हे मेरे परमेसवर, मेरे ताहीं दुश्मनां तै बचा,

मेरे ताहीं ऊँच्‍ची जगहां पै राखकै मेरे बिरोधियाँ तै बचा,

2 मेरे ताहीं बुराई करण आळे के हाथ तै बचा,

अर हत्‍यारां तै मेरा उद्धार कर।

3 क्यूँके देख, वे मेरी बाट म्ह सै;

हे यहोवा, मेरा कोए कसूर या पाप न्ही सै,

तोभी जुल्मी माणस मेरे खिलाफ कठ्ठे होए सै।

4 मै बेकसूर सूं तोभी वे मेरे तै लड़ण खात्तर मेरी ओड़ भाज-भाजकै आवै सै।

जाग, अर मेरी मदद कर, अर यो देख!

5 हे सेनाओं के परमेसवर यहोवा,

हे इस्राएल के परमेसवर सारी गैरजात्तां ताहीं दण्ड देण खात्तर जाग;

किसे धोक्खेबाज जुल्मी पै दया ना कर।

6 वो माणस साँझ नै बोहड़कै कुत्तै की तरियां गुर्रावै सै,

अर नगर के च्यांरु ओड़ घूम्मै सै।

7 देख वे डकारै सै, उनके मुँह के भित्तर तलवार सै,

क्यूँके वो कहवै सै, "कौण म्हारे ताहीं सुणै सै?"

8 पर हे यहोवा, तू उनपै हास्सैगा;

तू सारी गैरजात्तां ताहीं मजाक म्ह उड़ावैगा।

9 हे मेरे परमेसवर, मेरी ताकत, मै तेरे पैए ध्यान लगाऊँगा;

तू मेरा ऊँच्‍चा गढ़ सै।

10 परमेसवर करुणा करदा होया मेरे तै मिलैगा;

परमेसवर मेरे बिरोधियाँ के बारै म्ह मेरी इच्छा पूरी कर देवैगा।

11 उननै घात ना करै, इसा ना हो के मेरी प्रजा भूल जावै;

हे प्रभु, हे म्हारी ढाल!

अपणी शक्ति तै उननै तित्तर-बितर कर, उन ताहीं दबा दे।

12 वो अपणे मुँह के पाप, अर होठ्ठां के वचन,

अर श्राप देण, अर झूठ बोलण के कारण,

अभिमान म्ह फँसे होए पकड़े जावै।

13 आग बबूळा होकै उनका नाश कर,

उनका अन्त करदे ताके वो खतम हो जावै

फेर लोग जाणैगें के परमेसवर याकूब*59:13 याकूब इस्राएल के माणसों पै,

बलके धरती की छोर तक प्रभुता करै सै।

14 वो साँझ नै बोहड़कै कुत्याँ की तरियां गुर्रावै सै,

अर नगर के च्यांरु ओड़ घूम्मै सै।

15 वो टुकड़े खात्तर मारे-मारे फिरे,

अर ना छिके फेर भी रात भर*59:15 रात भर कुड़कुड़ावै सै, शिकायत गुर्रावै सै।

16 पर मै तेरी सामर्थ्य का यश गाऊँगा,

अर सबेरै तेरी करुणा का जयजयकार करुँगा।

क्यूँके तू मेरा ऊँच्‍चा गढ़ सै,

अर मुसीबत के बखत मेरा शरणस्‍थान ठहरा सै।

17 हे मेरे बल, मै तेरा भजन गाऊँगा,

क्यूँके हे परमेसवर, तू मेरा ऊँच्‍चा गढ़

अर मेरा करुणामय परमेसवर सै।