1 हे परमेसवर, मेरे पै दया कर, मेरे पै दया कर,

क्यूँके मन्‍नै तेरी शरण ली सै;

अर जिब ताहीं ये मुसीबत लिकड़ ना जावै,

तब तक मै तेरे पंखां के तळै शरण लिए रहूँगा।

2 मै परमप्रधान परमेसवर नै पुकारूँगा,

परमेसवर ताहीं जो मेरे खात्तर सब कुछ सिध्द करै सै।

3 परमेसवर सुर्ग तै भेजकै मेरे ताहीं बचा लेवैगा,

जिब मेरा निगळने आळा बुराई करण लागरया हो। (सेला)

परमेसवर अपणी करुणा अर सच्‍चाई जाहिर करैगा।

4 मै शेरां के बीच म्ह सूं,

जो मेरे ताहीं पाड़-खाण नै तैयार सै मन्‍नै उनकै बीच म्ह लेटणा पड्या सै,

मतलब इसे माणसां कै बीच म्ह जिनके दाँत बर्छी अर तीर सै*,

अर जिनकी जीभ तेज तलवार सै।

5 हे परमेसवर तू सुर्ग कै उप्पर घणा महान अर तेजोमय सै,

तेरी महिमा सारी धरती कै उप्पर फैल जावै!

6 उननै मेरे पैरां खात्तर जाळ बिछाया सै;

मेरा जी लिकड़या जावै सै।

उननै मेरै आग्गै खड्डा खोद्या,

पर खुद उस म्ह गिर पड़े।

7 हे परमेसवर, मेरा मन मजबूत सै, मेरा मन मजबूत सै;

मै गाऊँगा बलके भजन कीर्तन करुँगा।

8 हे मेरे मन जाग जा! हे सारंगी अर बीन जाग जाओ।

मै भी दिन लिकड़दे ए जाग उठूँगा।

9 हे प्रभु, मै देश-देश के माणसां के बीच तेरा धन्यवाद करुँगा;

मै राज्य-राज्य के माणसां के बीच म्ह तेरा भजन गाऊँगा।

10 क्यूँके तेरी करुणा की पोहच सुर्ग तक सै,

अर तेरी सच्‍चाई आकाशमण्‍डल तक पोहचै सै।

11 हे परमेसवर, तू सुर्ग के उप्पर घणा महान सै!

तेरी महिमा सारी धरती के उप्पर फैल जावै!