परमेसवर का सिध्द ज्ञान
प्रधान बजाण आळे खात्तर दाऊद का भजन
1 हे यहोवा तन्नै मेरे ताहीं जाँचकै जाण लिया सै।
2 तू मेरा उठणा-बैठणा जाणै सै;
अर मेरे विचारां नै दूरे तै समझ लेवै सै।
3 मेरे चाल्लण अर लेट्टण की तू आच्छी ढाळ छाणबीन करै सै,
अर मेरी पूरी चाल चलण का भेद तू जाणै सै।
4 हे यहोवा, मेरे मुँह म्ह इसी कोए बात न्ही
जिसनै तू पूरी तरियां तै ना जाणदा हो।
5 तन्नै मेरे ताहीं आग्गै-पाच्छै तै घेर राख्या सै,
अर अपणा हाथ मेरे पै राक्खे रहवै सै।
6 यो ज्ञान मेरै खात्तर भोत मुश्किल सै;
यो गम्भीर अर समझ तै बाहर सै।
7 मै तेरी आत्मा तै भाजकै कित्त जाऊँ?
या तेरै स्याम्ही तै कित्त भाज्जूँ?
8 जै मै अकास पै चढूँ, तो तू ओड़ै सै!
जै मै अपणा बिछोणा अधोलोक म्ह बिछाऊँ तो ओड़ै भी तू सै!
9 जै मै सबेरै की किरणा पै चढ़कै समुन्दर कै पार जा बसूं,
10 तो ओड़ै भी तू अपणे हाथ तै मेरी अगुवाई करैगा।
अर अपणे सोळे हाथ तै मन्नै पकड़े रहवैगा।
11 जै मै कहूँ के अँधेरे म्ह तो मै छिप ज्याऊँगा,
अर मेरै चारु ओड़ का चान्दणा रात का अँधेरा हो ज्यागा,
12 फेर भी अँधेरा मन्नै तेरे तै ना छिपावैगा रात तो दिन की तरियां चान्दणा देवैगी;
क्यूँके तेरै खात्तर अँधेरा अर चान्दणा दोनु एक जिसे सै।
13 तन्नै मेरे अन्दरूनी अंगां ताहीं बणाया सै;
तन्नै मेरे ताहीं माँ की कोख म्ह बणाया।
14 मै तेरा धन्यवाद करुँगा, इस करकै के मै खतरनाक अर बेमिसाल तरीके तै बणाया गया सूं।
तेरे काम तो अचम्भे के सै,
म्ह इननै आच्छी तरियां तै जाणु सूं।
15 जिब मै गुप्त जगहां म्ह बणाया जान्दा,
अर धरती के निचली जगहां म्ह बणाया जाऊँ था,
जद मेरी देह तेरे तै छिपी ना थी।
16 तेरी आँखां नै मेरे बिना आकार के तत्व ताहीं देख्या;
अर मेरे सारे अंग जो दिन बै दिन बणदे जाया करदे वे बणन तै पैहल्या
तेरी किताब म्ह लिखे होये थे।
17 मेरै खात्तर तो हे परमेसवर, तेरे विचार भोत अनमोल सै!
उनकी गिणती का जोड़ कितना बड़ा सै!
18 जै मै उननै गिणदा तो वो रेत कै कणां तै भी घणे होन्दे।
जिब मै जाग जाऊँ सूं, तब भी तेरे गैल रहूँ सूं।
19 हे यहोवा जरुर तू दुष्ट नै घात करैगा!
हे जुल्मियों139:19 जुल्मियों खून के प्यास्से , मेरे तै दूर हो जाओ।
20 क्यूँके वो तेरे खिलाफ विद्रोह करकै अर छळ के काम करै सै;
तेरे दुश्मन तेरा नाम झूठ्ठी बात पै लेवै सै।
21 हे यहोवा, के मै तेरे बैरियाँ तै बैर ना राक्खूँ,
अर तेरे बिरोधियाँ तै नफरत ना करुँ?
22 हाँ, मै उनतै पूरा बैर राक्खूँ सूं;
मै उननै अपणा दुश्मन समझू सूं।
23 हे यहोवा, मन्नै आच्छी रीति तै जाण ले!
अर मन्नै परख कै मेरी चिन्ता नै जाण ले!
24 अर देख के मेरे म्ह कोए बुरी चाल सै के न्ही,
अर हमेशा की जिन्दगी की राह म्ह मेरी अगुवाई कर!