भजन संहिता 142

अत्याचारी तै राहत खात्तर बिनती

दाऊद का मश्कील, जिब वो गुफा म्ह था प्रार्थना

1 मै यहोवा की दुहाई देऊँ सूं,

मै यहोवा तै गिड़गिड़ाऊँ सूं,

2 मै अपणे दुख की बात उसतै खोल कै कहूँ,

मै अपणी समस्या उसकै आग्गै प्रगट करुँ सूं।

3 जिब मेरी आत्मा मेरे भित्तर परेशान होरी थी,

तब तू मेरी हालत नै जाणै था!

जिस रास्ते पै मै जाण आळा था, उस्से म्ह उननै मेरे खात्तर जाळ बिछाया।

4 मन्‍नै सोळी ओड़ देख्या, पर कोए ना दिख्या।

मेरी खात्तर शरण किते ना रही, ना मन्‍नै कोए पूच्छै सै।

5 हे यहोवा, मन्‍नै तेरी दुहाई दी सै;

मन्‍नै कह्या, तो मेरा शरणस्‍थान सै,

मेरे जिन्दे जी तू मेरा भाग सै।

6 मेरे चिल्‍लाण की ओड़ ध्यान देकै सुण,

क्यूँके मेरी बड़ी बुरी हालत होगी सै।

जो मेरे पाच्छै पड़े सै, उनतै मन्‍नै बचाले;

क्यूँके वो मेरे तै घणे ताकतवर सै।

7 मन्‍नै जेळ म्ह तै काढ ताके मै तेरे नाम का धन्यवाद करुँ!

धर्मी माणस मेरी च्यांरु ओड़ आवैंगे;

क्यूँके तू मेरे पै करुणा करैगा।