Salmos 15

धर्मी का विवरण

दाऊद का भजन

1 हे यहोवा तेरे भवन म्ह कौण रहवैगा?

तेरे पवित्र पर्वत पै कौण बसण पावैगा?

2 वो जो खराई तै चाल्‍लै अर धर्म के काम करै सै,

अर दिल तै सच बोल्‍लै सै।

3 जो अपणी जीभ तै अपमान न्ही करदा,

अर ना दुसरे माणसां की बुराई करदा,

अर ना अपणे पड़ोसी का अपमान सुणै सै;

4 वो जिसकी निगांह म्ह निकम्मा माणस तुच्छ सै,

पर जो यहोवा के भय मान्‍नण आळे का आदर करै सै,

जो कसम खाकै बदलदा कोनी चाहे नुकसान ठाणा पड़ै;

5 जो अपणा रपियाँ ब्याज पै न्ही देंदा,

अर बेकसूर का नुकसान करण खात्तर रिसवत न्ही लेन्दा।

जो कोए इसी चाल चाल्‍लै सै वो कदे न्ही डगमगावैगा।