धर्मी जन की पीड़ा अर आशीर्वाद
प्रधान बजाण आळे खात्तर दाऊद का भजन
1 कितना धन्य सै वो, जो कंगाल की सुधि राक्खै सै!
मुसीबत कै दिन यहोवा उसनै बचावैगा।
2 यहोवा उसकी हिफाजत करकै उसनै जिन्दा राक्खैगा,
अर वो धरती पै धन्य होवैगा।
तू उसनै दुश्मनां की इच्छा पै ना छोड़।
3 जिब वो दर्द के मारे बिस्तर पै पड्या हो,
फेर यहोवा उसनै सम्भालैगा;
तू रोग म्ह उसके पूरे बिछोणे नै उल्ट कै ठीक करैगा।
4 मन्नै कह्या, "हे यहोवा, मेरे पै दया कर;
मन्नै चंगा कर,
क्यूँके मन्नै तो तेरे बिरुध्द पाप करया सै!"
5 मेरे दुश्मन या कहकै मेरी बुराई करै सै
"वो कद मरैगा, अर उसका नाम कद मिटैगा?"
6 अर जिब वो मेरे तै मिलण आवै सै,
तब वो बेकार की बात करै सै,
जब के उसका मन अपणे भित्तर अधर्म की बात कठ्ठी करै सै;
अर बाहर जाकै उनकी चर्चा करै सै।
7 मेरे सारे बैरी मिलकै मेरे बिरुध्द कानाफूसी करै सै;
वे मेरे नुकसान की कल्पना करै सै।
8 वे कहवै सै के इसकै तो कोए बुरा रोग लागग्या सै;
इब जो यो पड्या सै तो फेर कदे उठ्ठण न्ही पावैगा।
9 मेरा सबतै करीबी मित्तर जिसपै मै भरोस्सा राक्खूँ था,
जो मेरै गैल रोट्टी खावै था,
उसनै भी मेरे बिरुध्द लात ठाई सै।
10 पर हे यहोवा, तू मेरे पै दया करकै
मन्नै ठीक कर ताके मै उन ताहीं बदला देऊँ।
11 मेरा दुश्मन जो मेरे पै जीत न्ही पांदा,
इसतै मै जाण ग्या सूं के तू मेरे तै खुश सै।
12 अर मेरे ताहीं तो तू खराई तै सम्भाळ,
अर सदा खात्तर अपणे स्याम्ही राक्खै सै।
13 इस्राएल का परमेसवर यहोवा
शरुआत तै अन्तकाल तक धन्य सै
आमीन, फेर आमीन।