Salmos 46

परमेसवर म्हारा शरणस्‍थान

प्रधान बजाण आळे खात्तर कोरहवंशियों का, अलामोत की राग पै एक गीत

1 परमेसवर म्हारा शरणस्‍थान अर ताकत सै,

संकट म्ह आसान्‍नी तै मिलण आळा मददगार।

2 इस कारण हमनै कोए डर कोन्या चाहे धरती

उल्ट जावै,

अर पहाड़ समुन्दर के बीच म्ह गेर दिए जावै;

3 चाहे समुन्दर का पाणी गरजै अर झाल उठ्ठै,

अर पहाड़ उसकी बाढ़ तै काँप उठ्ठै। (सेला)

4 एक नदी सै जिसकै पाणी तै परमेसवर के

नगर म्ह

यानी परमप्रधान के पवित्र भवन नै

आनन्द होवै सै।

5 परमेसवर उस नगर के बीच म्ह सै, वो कदे

टळण का कोन्या;

पौ फटते ही परमेसवर उसकी मदद करै सै।

6 जात्ति-जात्ति के माणस झल्‍ला उठे, राज्य-राज्य

के माणस डगमगाण लाग्गे;

वो बोल उठ्या, अर धरती पिघळगी।

7 सेनाओं का यहोवा म्हारै गैल सै;

याकूब का परमेसवर म्हारा ऊँच्‍चा गढ़ सै। (सेला)

8 आओ, यहोवा के बड़े-बड़े काम्मां नै देक्खो,

के उसनै धरती किस ढाळ विरान

करी सै।

9 वो धरती की छोर तक लड़ाईयाँ नै मिटावै सै;

वो धनुष नै तोड़ै, अर भाल्‍लै के दो टुकड़े करदे सै,

अर लड़ाई के रथां नै आग म्ह झोंक देवै सै!

10 "चुप हो जाओ*46:10 चुप हो जाओ लड़ाई बन्द करो, अर जाण ल्यो के मै ए परमेसवर सूं।

मै जातियाँ म्ह महान सूं,

मै पूरी दुनिया म्ह महान सूं!"

11 सेनाओं का यहोवा म्हारै गैल सै;

याकूब का परमेसवर म्हारा ऊँच्‍चा गढ़ सै। (सेला)