1 सचमुच मै चुपचाप होकै परमेसवर की ओड़ मन लगाऐ सूं;

मेरा उद्धार उस्से तै होवै सै।

2 सचमुच वोए, मेरी चट्टान अर मेरा उद्धार सै,

वो मेरा गढ़ सै; मै कदे न्ही डिगूँगा।

3 थम कद तक एक माणस पै धावा बोलदे रहोगे,

के सारे मिलकै उसका नाश करो?

वो तो झुकी होई भीत या गिरदे होए बाड़े की तरियां सै*।

4 सचमुच वे उस ताहीं, उसके ऊँच्‍चे पद तै गिराण की सलाह करै सै;

वे झूठ तै खुश रहवै सै।

मुँह तै तो वे आशीर्वाद देवै पर मन म्ह कोस्सै सै।

5 हे मेरे मन, परमेसवर के स्याम्ही चुपचाप रह,

क्यूँके मेरी आस उस्से पै सै।

6 सचमुच वो मेरी चट्टान, अर मेरा उद्धार सै,

वो मेरा गढ़ सै; इस करकै मै ना डिगूँगा।

7 मेरे उद्धार अर मेरी महिमा का आधार परमेसवर सै;

मेरी मजबूत चट्टान, अर मेरा शरणस्‍थान परमेसवर सै।

8 हे माणसों, हर बखत उस पर भरोस्सा राक्खो;

उसतै अपणे-अपणे मन की सारी बात खोलकै कहो;

परमेसवर म्हारा शरणस्‍थान सै।

9 सचमुच नीच माणस तो अस्‍थाई, अर बड़े लोग झूठ्ठे ए सै;

तौल म्ह वो हळके लिकड़ै सै;

वो सारे के सारे साँस तै भी हळके सै।

10 अन्धेर करण पै भरोस्सा ना राक्खो,

अर लूट-पाट करणे पै ना फूल्‍लो;

चाहे धन-सम्पत्ति बढ़े, फेर भी उसपै मन ना लगाईयो।

11 परमेसवर नै एक बार कह्या सै;

अर दो बार मन्‍नै सुण्या सै:

के सामर्थ्य परमेसवर की सै।

12 अर हे प्रभु, करुणा भी तेरी सै।

क्यूँके तू एक-एक माणस नै उसके काम के मुताबिक फळ देवै सै।