1 सचमुच इस्राएल खात्तर मतलब शुद्ध मन आळयां खात्तर परमेसवर भला सै।

2 मेरे कदम तो उखड़ना चाहवै थे,

मेरे कदम फिसळण पैए थे।

3 क्यूँके जिब मै दुष्टां की सलामती देक्खूँ था,

फेर उन घमण्डियाँ कै बारै म्ह जळण करुँ था।

4 क्यूँके उनकी मौत म्ह तकलीफ न्ही होन्दी,

पर उनकी ताकत अटूट रहवै सै।

5 उननै दुसरे माणसां की तरियां दुख न्ही होन्दा;

अर दुसरे माणसां की तरियां उनपै मुसीबत न्ही पड़दी।

6 इस कारण घमण्ड उनके गळे का हार बण्या सै;

उनका ओढ़णा उपद्रव सै।

7 उनकी आँखां पै चर्बी चढ़री सै,

उनकी मन की भावनाएँ उमड़ै सै।

8 वे मजाक करै सै, अर दुष्टता तै अन्धेर की बात बोल्‍लै सै;

वे डींग मारै सै।

9 वे जणु सुर्ग म्ह बेठ्ठे होए बोल्‍लै सै,

अर वे धरती पै बोलदे फिरै सै।

10 फेर भी उसकी प्रजा उरै उलटी बोहड़ आवैगी,

अर उन ताहीं भरे होए प्‍याल्‍ले का पाणी मिलैगा।

11 फेर वो कहवै सै, "परमेसवर किस तरियां जाणै सै?

के परमप्रधान नै कुछ ज्ञान सै?"

12 देक्खो, ये तो दुष्ट माणस सै;

फेर भी सदा आराम तै रहकै, धन-सम्पत्ति बटोरते रहवै सै।

13 हाँ, मन्‍नै अपणे दिल ताहीं बेकार म्ह शुद्ध करया

अर अपणे हाथ निर्दोषता म्ह धोए सै;

14 क्यूँके मै दिन भर मार खान्दा आया सूं

अर हर रोज सबेरै मेरी ताड़ना होन्दी आई सै।

15 जै मन्‍नै कह्या होन्दा के "मै इसाए कहूँगा,"

तो देख मै तेरी औलाद कै गैल कपट करदा,

16 जिब मै सोच्‍चण लाग्या के इस ताहीं मै किस तरियां समझूँ,

तो या मेरी नजर म्ह घणी बड़ी समस्या थी,

17 जिब तक मन्‍नै परमेसवर के पवित्र स्‍थान म्ह जाकै

उन माणसां के नतिज्जें के बारै म्ह ना सोच्‍चा।

18 पक्‍का तू उननै फिसळण आळी जगहां म्ह राक्खै सै;

अर गेरकै सत्यानाश कर देवै सै।

19 वे पलभर म्ह किस तरियां उजड़गे सै!

वे मिटगे, वे डरदे-डरदे नाश होगे सै।

20 जिस तरियां जागण आळा सपने नै तुच्छ जाणै सै,

उसे तरियां ए प्रभु जिब तू उठ्ठैगा, तब उन ताहीं छाया की तरियां समझकै तुच्छ जाणैगा।

21 मेरा मन तो कड़वा होग्या था,

मेरा अन्‍त:करण छिद ग्या था,

22 मै तो अज्ञानी अर नासमझ था,

मै तो तेरे स्याम्ही पशु की ढाळ था।

23 फेर भी मै लगातार तेरै गैल था;

तन्‍नै मेरे सोळे हाथ ताहीं पकड़े राख्या।

24 तू सलाह देन्दा होया, मेरी अगुवाई करैगा,

अर तब मेरी महिमा करकै मेरे ताहीं अपणे धोरै राक्खैगा।

25 सुर्ग म्ह मेरा और कौण सै?

तेरै गैल रहन्दे होए मै धरती पै और कुछ न्ही चाहन्दा।

26 मेरी देह अर मन दोन्‍नु तो हारगे सै,

पर परमेसवर सदा खात्तर मेरा भाग

अर मेरे दिल की ताकत* बण्या सै।

27 जो तेरे तै दूर रहवै सै वो तो नाश होवैंगे;

जो कोए तेरे खिलाफ जारी करै सै,

उसनै तू नाश करै सै।

28 पर परमेसवर के धोरै रहणा, योए मेरे खात्तर भला सै;

मन्‍नै प्रभु यहोवा ताहीं अपणा शरणस्‍थान मान्या सै,

जिसतै मै तेरे सारे काम्मां का जिक्र करुँ।