Salmos 8

परमेसवर की महिमा अर माणस का गौरव

प्रधान बजाण आळे खात्तर गित्तीत की राग पै दाऊद का भजन

1 हे यहोवा म्हारे प्रभु, तेरा नाम सारी धरती पै कितना प्रतापमय सै।

तन्‍नै अपणा वैभव सुर्ग पै दिखाया सै।

2 तन्‍नै अपणे बैरियाँ कै कारण बाळकां अर दूध पीन्दे बच्यां कै जरिये अपणी बड़ाई करी सै,

ताके तू दुश्मन अर पलटा लेण आळयां नै रोक्‍के राक्खै।

3 जिब मै अकास नै, जो तेरे हाथ का काम सै,

अर चाँद अर तारयां नै जो तन्‍नै ए बणाये सै, देक्खूँ सूं।

4 तो फेर माणस के सै के तू उसनै याद राक्खै,

अर आदमी के सै के तू उसकी सुधि ले?

5 क्यूँके तन्‍नै उस ताहीं परमेसवर*8:5 परमेसवर सुर्गदूत तै कम तै थोड़ा ए घाट बणाया सै,

अर महिमा अर प्रताप का मुकुट उसकै सिर पै धरया सै।

6 तन्‍नै उस ताहीं अपणे हाथ्थां के काम्मां पै प्रभुता दी सै,

तन्‍नै उसकै पायां तळै सारा किमे कर दिया सै*8:6 तन्‍नै उसकै पायां तळै सारा किमे कर दिया सै 1 कुरि 15:27; इफि 1:22; इब्रा 2:6-9; प्रेरि 17:31।

7 सारी भेड़-बकरी अर गां-बळध

अर जितने जंगळी-पशु सै,

8 अकास के पंछी अर समुन्दर की मछलियाँ,

अर जितने जीव-जन्तु समुन्दरां म्ह चाल्‍लै-फिरै सै।

9 हे यहोवा, हे म्हारे प्रभु,

तेरा नाम सारी धरती पै कितना प्रतापमय सै।