1 यहोवा राजा होया सै, धरती मगन हो;

अर द्वीप जो भोत-से सै, वो भी खुशी मनावै!

2 बादळ अर अँधेरा उसके च्यांरु ओड़ सै;

उसके सिंहासन की नींव धर्म अर न्याय सै।*

3 उसकै आग्गै-आग्गै आग चाल्दी होई

उसके दुश्मनां नै च्यांरु ओड़ तै भस्‍म करै सै।

4 उसकी बिजळियाँ तै दुनिया रोशन होई,

धरती देखकै थरथरागी सै!

5 पहाड़ यहोवा कै स्याम्ही,

मोम की तरियां पिघळगें,

यानिके सारी धरती के परमेसवर कै स्याम्ही।

6 अकास नै उसके धर्म की गवाही दी;

अर देश-देश के सारे माणसां नै उसकी महिमा देक्खी सै।

7 यहोवा उनतै प्यार करै सै जो बुराई तै नफरत करै सै*

अर जो मूरतां पै घमण्ड करै सै, वे शर्मिन्दा हों;

हे सारे देवताओं थम उसे नै दण्डवत करो।

8 सिय्योन सुणकै खुश होया,

अर यहूदा की बेट्टी मगन होई;

हे यहोवा, यो तेरे नियमां कै कारण होया।

9 क्यूँके हे यहोवा, तू सारी धरती कै उप्पर परमप्रधान सै;

तू सारे देवत्यां तै घणा महान ठहरया सै।

10 हे यहोवा के प्रेमियों, बुराई तै नफरत करो;

वो अपणे भक्‍तां की जान की हिफाजत करै सै,

अर उन ताहीं दुष्टां कै हाथ तै बचावै सै।

11 चान्दणा धर्मी माणसां पै चमकै सै*,

अर सीध्धे मन आळयां खात्तर आनन्द बोया गया सै।

12 हे धर्मियों, यहोवा कै कारण खुश हो;

अर जिस पवित्र नाम तै वो याद करया जावै सै, उसका धन्यवाद करो!