ମୟାବକେ ବାବ୍ବାଣି
1 ମୟାବ ବିସୟାର୍ ବାବ୍ବାଣି କୟିଲାର୍। ମୟାବର୍ ବିନ୍ ଗଃଳ୍ମଃନ୍କେ ଗଟେ ରାତି ବିତ୍ରେ ସଃବୁ ସଃମ୍ପତି ନେତି ଆର୍ ବଃସମ୍ କଃରର୍ତି; ଗଟେ ରାତି ବିତ୍ରେ ମୟାବର୍ କିର୍ ଗଃଳାର୍ ସଃବୁ ସଃମ୍ପ୍ତି ନେତି ଆର୍ ବଃସମ୍ କଃର୍ତି। 2 ସେ ରଃଦନ୍ କଃରୁକ୍ ବେତଲ୍କେ ଆର୍ ଦିବନ୍କେ, ଉଚା ଜଃଗାକେ ଜାୟ୍ ଆଚ୍ତି; ମୟାବର୍ ଲଃକ୍ମଃନ୍ ନବା ଆର୍ ମେଦବାର୍ ବିସୟେ କାନ୍ଦୁଲାୟ୍; ସେ ସଃବୁଲକାର୍ ମୁଣ୍ଡ୍ କୁରାୟ୍ ଟଃଙ୍ଗ୍ରା କଃରାଅୟ୍ ଆଚେ; ହଃତି ଲକାର୍ ଚଳ୍ମେସ୍ କାଟା ଅୟି ଆଚେ। 3 ସେମଃନାର୍ ସଃବୁ ରଃସ୍ତାବାଟେ ଲକମଃନ୍ ବାସ୍ତା ବଃସ୍ତର୍ ହିନ୍ଦି ଆଚ୍ତି; ନିଜାର୍ ନିଜାର୍ ଗଃରାର୍ ଚାନି ଉହ୍ରେ ଆର୍ ଚକ୍ ଜଃଗାୟ୍ମଃନ୍ ହଃତିଲକ୍ ଅଃପର୍ବଳ୍ ଆଉଲି ଅୟି କାନ୍ଦୁଲାୟ୍। 4 ହିସ୍ବନ୍ ଆର୍ ଇଲିୟାଲି କାନ୍ଦୁଲାୟ୍; ସେମାନ୍ଙ୍କାର୍ କାନ୍ଦ୍ତାର୍ ଜହସ୍ ହଃତେକ୍ ସୁଣା ଜଃଉଁଲି; ଇତାର୍ଗିନେ ମୟାବର୍ ଜଃଗ୍ରାତ୍ ଅୟ୍ଲା ସଃୟ୍ନ୍ମଃନ୍ ଡିରିକଃରି ରଦନ୍ କଃରୁଲାୟ୍; ତାକାର୍ ଜିବନ୍ ସେମଃନ୍କାର୍ ବିତ୍ରେ ତଃର୍ତଃରି ଜଃଉଁଲି। 5 ମର୍ ଜିବନ୍ ମୟାବ ଗିନେ କାନ୍ଦୁଲି; ସେତିର୍ ଲଃକ୍ମଃନ୍ ଇଗ୍ଲତ୍-ଇଲିସିୟା ଆର୍ ଦୁରି ରିଲା ସଃୟିନ୍ ଆସ୍ର ହାଉଁକେ ଜଃଉଁଲାୟ୍; କାୟିତାକ୍ ବଃଲେକ୍ ସେମଃନ୍ କାନ୍ଦି କାନ୍ଦି ଲୁହିତ-ଗାଟି ବାଟ୍ ଚଃଗୁଲାୟ୍; ହରନିୟର୍ ରଃସ୍ତାୟ୍ ଜାତା ବଃଳ୍ ବିନାସ୍ ଗିନେ ବଃଡ୍ ଟଣ୍ଡେ ରଃଦନ୍ କଃରୁଲାୟ୍। 6 କାୟତାକ୍ବଃଲେକ୍ ନିମ୍ରିମର୍ ହାଣି ସଃବୁ ସୁକି ଜାୟ୍ଦ୍; କଃଉଁଣା ଡାଳ୍ମାଳ୍ ସଃବୁ ରଃୟ୍ ନଃକେରେ, କଃଚାହଃତ୍ରିଆ ଜିନିସ୍ କାୟିରିହେଁ ନଃରେୟ୍। 7 ଇତାର୍ଗିନେ ସେମଃନ୍ ନିଜାର୍ ନିଜାର୍ ସଃମ୍ପତି ଆର୍ ଅଃର୍ଜ୍ଲା ଜିନିସ୍ ସଃବୁକେ ବାଇସ୍ ନାଉଁଆର୍ ଗଃଚାର୍ ଚଃମେ ନେୟ୍ ସଃଙ୍ଗାୟ୍ଲାୟ୍। 8 କାୟିତାକ୍ ବଃଲେକ୍ ମୟାବର୍ ଚାରିଦିଗେ ସଃନ୍ଦିକେ କାନ୍ଦ୍ତା ସଃବଦ୍ ସୁଣା ଜଃଉଁଲି; ସେତିର୍ ରଃଦନାର୍ କାନ୍ଦ୍ଣି ଦୁରି ରିଲା ଇଗ୍ଲିୟମ୍ ଆର୍ ବେଟ୍ଲାୟ ହଃତେକ୍ ସୁଣା ଜଃଉଁଲିସ୍। 9 କାୟିତାକ୍ ବଃଲେକ୍ ଦିମନାର୍ ହାଣି ସଃବୁ ବଃନିହର୍ ଅୟିଆଚେ; ଆରେକ୍ ମୁୟଁ ଦିମନ୍ ଉହ୍ରେ ଅଃଦିକ୍ ଦୁକ୍ ଆଣିନ୍ଦ୍ ଆର୍ ମୟାବର୍ ଜାତା ଲକମଃନ୍କାର୍ ଉହ୍ରେ ଆର୍ ବାକି ଲକ୍ମଃନ୍କାର୍ ଗିନେ ଗଟେକ୍ ସିମାବାଗ୍ ଆଣିନ୍ଦ୍, ସେ ବାଗ୍ ସେମଃନ୍କେ କାୟ୍ଦ୍।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)