1 ଏ ଦେସାର୍‌ ଲଃକ୍‌ମଃନ୍‌, ଲଃଗେ ଆସି ସୁଣା, ଏ ଗସ୍ଟିମଃନ୍‌ ତୁମିମଃନ୍‌ ମଃନ୍‌ଦିଆସ୍‌; ହୁର୍ତିବି ସେତିର୍‌ ସଃବୁ ସୁଣ; ସେତି ରିଲା ସଃବୁ ଜିନିସ୍‌ ସୁଣ। 2 କାୟିତାକ୍‌ବଃଲେକ୍‌ ସଃବୁଲକାର୍ ବିରୁଦେ ମାପୁର୍‌ ତାର୍‌ ରିସା ଆର୍‌ ସେମଃନାର୍ ସଃବୁ ସଃୟ୍‌ନ୍‌ମଃନାର୍ ବିରୁଦେ ତାର୍‌ ବେସି ରିସା ଆଚେ। ସେ ସେମଃନ୍‌କେ ହୁରା ହୁରି ନାସ୍‌କଃରି ଆଚେ, ସେ ସେମଃନ୍‌କେ କଃରୁକେ ସଃହ୍ରିଦଃୟ୍‌ଆଚେ। 3 ସେମଃନାର୍ ଅଃତ୍ୟା ଅୟ୍‌ଲା ଲଃକ୍‌ମଃନ୍‌ ହଃଦାୟି ହଃକା ଜାୟ୍‌ଦ୍‌, ସେମଃନାର୍‌ ମଃଳ୍‌ଗଃନ୍ଦ୍‌ ବାରୟ୍‌ଦ୍‌ ସେମଃନାର୍ ବଃନିଏ ନାଳ୍‌ଜାୟିଦ୍‌। 4 ଆର୍‌ ଅଃଗାସ୍‌ ମଃଣ୍ଡଳାର୍ ବେଳ୍‌, ଜଃନ୍‍, ତାରାମଃନ୍‌ କୁରୁପ୍‌ ନାସ୍‌ ଅଃଉତି ଆର୍‌ ଜଃଜ୍‌ନାର୍ ଲେକାହଃତାର୍‌ ହର୍‍ ଗୁଳ୍ୟାୟ୍‌ ଅଃଉତି; ଆର୍‌ ଅଃଙ୍ଗୁର୍‌ ମାଳାର୍ ସୁକ୍‌ଲା ହଃତାର୍ ଆର୍‌ ଡୁମୁର୍‌ ଗଃଚାର୍ ସୁକ୍‌ଲା ହଃତାର୍ ସେ ହର୍‍ ସେମଃନ୍‌ ନଃସ୍ଟ୍‌ ଅଃଉତି। 5 କାୟିତାକ୍‌ବଃଲେକ୍‌ ଅଃମାର୍‌ ଇସ୍ୱର୍‌ ସଃର୍ଗେ ତାର୍‌ କଃଣ୍ଡା ତିଆର୍ କଃରିଆଚେ, ଅଃବେ ଇଦମ୍‌କେ ମାରେଦ୍‌, ସେରି ଅଃମାର୍‌ ଇଦମାର୍ ଲକ୍‌ମଃନାର୍ ଉହ୍ରେ ହଃଳେଦ୍‌। 6 ଇସ୍ୱରାର୍‌ କଃଣ୍ଡା ବକା ବଃନିଏ ସଃଲ୍‌ମତ୍‌ ଆର୍‌ ବଃସେ ଆର୍‌ ମେଣ୍ଡାମଃନାର୍ ବଃନି ଡୁଣ୍ଡାୟ୍‌ ସଃର୍ଦା ଅୟିଆଚେ; କାୟିତାକ୍‌ ବଃଲେକ୍‌ ବସ୍ରାଟାଣେ ମାପୁର୍‌ ଇସ୍ୱରାର୍‌ ଗଟେକ୍‌ ଜଗିଅଁବେଦି ଆର୍‌ ଇଦମେ ଗଟେକ୍‌ ଅଃତ୍ୟା ଅୟ୍‌ଦ୍‌। 7 ଆର୍‌ ସେମଃନାର୍ ସଃଙ୍ଗ୍‌ ବଃନ୍‌ଗାୟ୍‌, ବଃୟିଲ୍‌ ସଃଙ୍ଗ୍‌ ବେଣ୍ଡିଆ ବଃୟ୍‌ଲ୍‌ ଆସେଦ୍‌; ତଃବେ ସେମଃନାର୍ ଦେସ୍‌ ବଃନିଏ ମାତେଦ୍‌ ଦେସାର୍ ସେମଃନାର୍ ବଃସ୍‌ ଦୁଳିଏ ଚଃଟ୍‌କି ଅୟ୍‌ଦ୍‌। 8 କାୟିତାକ୍‌ ବଃଲେକ୍‌ ଇରି ମାପୁର୍‌ ବାଦ୍‌ଲା ନେତା ଦିନ୍‌, ଇରି ସିୟନାର୍‌ ମାଡ୍‌ଗଳ୍‌ ତାର୍‌ ହଃଳ୍‌ ଦେତାର୍ ବଃର୍ସ୍। 9 ଆରେକ୍‌ ଇଦମାର୍‌ ଗାଡ୍‌ ସଃବୁ ଦୁହ୍‌ନିଏ ଆର୍‌ ସେତିର୍‌ ଦୁଳି ସଃବୁ ଦାରୁଗୁଣ୍ଡ୍‌ ହାସ୍‌ଲେଦ୍‌, ସେତିର୍‌ ବୁୟ୍‌ଁ ଜୟ୍‌ଲାଗ୍‌ତା ଦୁହ୍‌ନି ଅୟ୍‌ଦ୍‌। 10 ସେରି ଦିନ୍‌ରାତି ହଡ୍‌ତି ରଃୟ୍‌ଦ୍‌; ସେତିର୍‌ ଦୁଆଁ ଦିନ୍‌ରାତି ଉଟେଦ୍‌; ଜୁଗ୍‌ଜୁଗ୍‌ ସେରି ମରୁବଃଟା ଅୟ୍‌ରଃୟ୍‌ଦ୍‌; କାଳ୍‌କାଳ୍‌ ସେତି କେଏ ଜାୟ୍‌ନଃକେର୍‌ତି। 11 ମଃତର୍‌ ହାଣିସୁଣା ଆର୍‌ ସାଣିଙ୍ଗ୍‌ ସେରି ଅଃଦିକାର୍‌ କଃର୍ତି; ଆର୍‌ କୁର୍ମା ଆର୍‌ ହାଣିକାଉଆ ସେତି ବାସ୍‌କଃର୍ତି; ମାପୁର୍ ଇତାକେ ଆରେକ୍‌ ଚୁଚା କଃରେଦ୍ ହୁର୍ତି ଉବ୍‌ଜାଣ୍‌ ଅଃଉତାବଃଳ୍‌ ଜଃନ୍‌କାର୍‌ ରିଲି। 12 ଦେସ୍‌କେ ଚାଲାଉଁକେ କେଏ ରଃଜା ନଃରେତି ଆର୍‌ ନେତାମଃନ୍‌ ସଃବୁ କେଣେ ନାସ୍‌ ଅଃଉତି। 13 ଇଦମାର୍‌ କଃତିକୁଡେ କାଟା ଆର୍‌ ସେତିର୍‌ ଜାଗୁଆଳିମେଳ୍‌ ସଃବୁ ଲଃଚ୍‌ଉଆଣିଜାଳ୍‌ ଆର୍‌ କାଟା ବୁଟା ବାଡେଦ୍‌ ସେରି କଗ୍‌ମଃନାର୍ ଆର୍‌ କୁର୍‌ମାଚେଳେ ବାସା ଟାଣ୍‌ ଅୟ୍‌ଦ୍‌। 14 ଆର୍‌ ସେତି ବଃନାର୍‌ ହସୁମଃନ୍ ଚଃର୍ତି ଆର୍‌ ଚେଳି ଦେଉତା ନିଜାର୍ ସଃଙ୍ଗାର୍‌ତାକେ କୁଦେଦ୍‌; ଆର୍‌ ବୁତ୍‌ଣି ସେତି ବାସାକଃରି ସେତି ବିସାଉତା ଟାଣ୍‌ ହାୟ୍‌ଦ୍‌। 15 ସେତି କୁର୍ମା ବାସା ବାନ୍ଦେଦ୍‌ ଆର୍‌ ଡିମ୍‌ ଦଃୟ୍‌ଦ୍‌ ଆର୍‌ ହିଲା ହୁଟାୟ୍‌ ନିଜାର୍ ହିଲାକେ ଚାୟ୍‌ତଃଳେ ରୁଣ୍ଡାୟ୍‌ଦ୍‌; ଆରେକ୍‌ ବିରାମଃନ୍‌ ସଃବୁ ନିଜେ ନିଜେ ସେତି ରୁଣ୍ଡ୍‌ତି। 16 ତୁମିମଃନ୍‌ ମାପୁର୍‌ ଇସ୍ୱରାର୍‌ ଚାମ୍‌ପୁସ୍ତକ୍‌ କଜିକଃରି ହାଟ୍‌କଃରା; ଇମଃନାର୍‌ ବିତ୍ରେ ସଃବୁ ରେତି, କେଏ ନିଜାର୍ ସଃଙ୍ଗ୍‌ଉଆଳି ନୟ୍‌ଲାର୍‌ ନାୟ୍‌; କାୟିତାକ୍‌ ବଃଲେକ୍‌ ମର୍‌ ଟଣ୍ଡେ ସେ ଆଦେସ୍‌ ଦଃୟ୍‌ଆଚେ ତାର୍‌ ଆତ୍ମା ସେମଃନ୍‌କେ ରୁଣ୍ଡାୟ୍‌ ଆଚେ। 17 ଆର୍‌ ସେ ସେମଃନାର୍ ହାଁୟି ଜଃମି ଆଣ୍ଡିଜିକ୍ରା ତଃୟ୍‌ ଚିନାକଃରି ବାଟାକଃରି ଦଃୟ୍‌ଆଚେ ଆର୍‌ ଆତେନାହ୍‌ଲା ଡରେ ନାହିକଃରି ବାଗ୍‌କଃରି ଦଃୟ୍‌ଆଚେ; ସେମଃନ୍‌ ସେରି ଜୁଗେ ଜୁଗେ ଅଃଦିକାର୍‌ କଃର୍ତି ସେମଃନ୍‌ ସଃବୁ ଦିନାର୍ ଗିନେ ବାସ୍‌କଃର୍ତି।