1 ମରୁବଃଟା ଆର୍‌ କାୟିରି ନୟିଲା ଟାଣ୍‌ ସଃର୍ଦା କଃରେଦ୍‌; ମରୁବଃଟା ଉଲ୍‌ସିକଃରି ଗୁଲାପି ହର୍‍ ଚଃଚଲ୍‌ଅୟ୍‌ଦ୍‌। 2 ସେରି ବେସି ଉଚାଟ୍‌ ଅୟ୍‌ଦ୍‌, ଆରେକ୍‌ ସଃର୍ଦା ଆର୍‌ ଗିତ୍‌କୟ୍‌ ସଃର୍ଦାଅୟ୍‌ଦ୍‌; ଲିବାନନାର୍ ସଃକ୍ତି, କର୍ମିଲ୍‌ ଆର୍‌ ସାରଣାର୍ ଜଃଜ୍‌ମାନ୍‌ ତାକେ ଦିଆଅୟ୍‌ଦ୍‌; ସେମଃନ୍‌ ଇସ୍ୱରାର୍‌ ସଃକ୍ତି ଆର୍‌ ଇସ୍ୱର୍‌ ମାପୁରାର୍‌ ଜଃଜ୍‌ମାନ୍‌ ଦଃକ୍‌ତି। 3 ତୁମିମଃନ୍‌ ଦୁର୍ବଳ୍‌ ଆତ୍‌କେ ସଃକ୍ତି କଃରା ଆର୍‌ ତର୍‌ତର୍‌ତା ମାଣ୍ଡିକେ ତିର୍‌କଃରା। 4 ଡିର୍ତା ମଃନାର୍ ଲକେ କଃଉଆ ସାସ୍‌ଦଃରା ଡିରା ନାୟ୍‌; ଦଃକା ଇସ୍ୱର୍‌ ତୁମିକେ ରଃକ୍ୟା କଃରୁକେ ଆସୁଲା, ଇସ୍ୱର୍‌ ତୁମାର୍‌ ସଃତ୍ରୁମଃନ୍‌କେ ଦଃଣ୍ଡ୍‌ ଦେଉଁକେ ଆସୁଲା। 5 ସଃଡେବଃଳ୍ କାଣାମଃନାର୍‌ ଆକି ହିଟେଦ୍‌ ଆର୍‌ ବଃୟିରାମଃନାର୍ କାନ୍‌ ହିଟେଦ୍‌। 6 ସଃଡେବଃଳ୍‌ ଚଟାମାନାୟ୍‌ କଟ୍ରାହର୍‌ ସଃର୍ଦାଅୟ୍‌ ଡଗାୟ୍‌ଦ୍‌ ଆର୍‌ ଟଣ୍ଡ୍‌ନଃହୁଟାତା ମାନାୟ୍‌ ଗିତ୍‌ କୟ୍‌ଦ୍‌; କାୟିତାକ୍‌ବଃଲେକ୍‌ ମରୁବଃଟାୟ୍‌ ହାଣି ବାରୟ୍‌ଜାୟିଦ୍‌। 7 ହଡ୍‌ତାବାଲି ହାଣିବଃନ୍ଦ୍‌ ଅୟ୍‌ଦ୍‌; କଗ୍‌ମଃନାର୍ ବାସାୟ୍‌ ସେମଃନାର୍ ସଃଉତା ଟାଣେ ପାପିରସ୍‌ବୁଟା, ବଃରୁଆବୁଟା, ସଃର୍ଣ୍ଡିବୁଟା ଉଟେଦ୍‌। 8 ଆର୍‌ ସେତି ଗଟେକ୍‌ ରଃଜାର୍‌ ରଃସ୍ତା ଅୟ୍‌ଦ୍‌ ସେରି ପବିତ୍ର ବାଟ୍‌ବଃଲି ଡାକ୍‌ହୁଟେଦ୍‌; ମଃତର୍‌ କୁୟି ବିଟାଳ୍‌ଲକ୍‌ ସେତି ଚାଲିନଃକେରେ; ଇ ବାଟ୍‌ଇଣ୍ଡ୍‌ତା ଲକ୍‌ମଃନ୍‌କେ କେଏ ବୁଲ୍‌କାୟ୍‌ ନଃକେରେ 9 ସେତି କାୟି ଜିବ୍‌ଜଃତୁ ନଃଜାତି, ସେମଃନ୍‌ ସେତି ଦଃକାନଃଜାତି, ମଃତର୍‌ ମୁକ୍ତ୍ ହାୟ୍‌ଲା ଲଃକ୍‌ମଃନ୍‌ ସେତି ଜାତି। 10 ଆର୍‌ ଇସ୍ୱର୍‌ ମାପୁରାର୍‌ ମୁକ୍ତି ହାୟ୍‌ଲା ଲଃକ୍‌ମଃନ୍‌ ବାଉଳି ଆସ୍ତି ଆର୍‌ ଗିତ୍‌ କଃଉଁ କଃଉଁ ସିୟନେ ଆସ୍‌ତି ସଃବୁ ସଃର୍ଦାୟ୍‌ ସେମଃନାର୍ ମୁଣ୍ଡ୍‌ଟହ୍ରି ଅୟ୍‌ଦ୍‌, ରଃଦନ୍‌ ଆର୍‌ ନଃରେୟ୍‌।