Salmos 19

सृष्टि कै जरिये सृष्टिकर्ता की महिमा का जिक्र

1 अकास परमेसवर की महिमा का जिक्र करण लाग रह्या सै;

अर अकासमण्डल उसकी हाथ्थां की कला नै जाहिर करण लाग रह्या सै।

2 दिन तै दिन बात करै सै,

अर रात नै रात ज्ञान सिखावै सै।

3 ना तो कोए बोल्‍ली अर ना कोए भाषा,

जड़ै उनकी आवाज सुणाई न्ही देन्दी।

4 फेर भी उनका स्वर सारी धरती पै गूँजग्या सै,

अर उनके वचन दुनिया की छोर ताहीं पोहचगे सै।

उन म्ह उसनै सूरज खात्तर एक मण्डप खड्या करया सै,

5 जो बन्दड़े की तरियां अपणे महल तै लिकाड़ै सै।

वो शूरवीर की तरियां अपणी दौड़ दौड़ण तै खुश होवै सै।

6 वो अकास की एक छोर तै लिकड़ै सै,

अर वो उसकै दुसरे छोर तक चक्‍कर मारै सै;

अर उसकी गर्मी सारया ताहीं पोहचै सै।

7 यहोवा के नियम खरे सै, वो जी म्ह नई ताजगी देवै सै;

यहोवा के नियम बिश्वास लायक सै,

साधारण माणसां नै बुद्धिमान बणा देवै सै।

8 यहोवा के उपदेश सिध्द सै; मन नै आनन्दित कर देवै सै;

यहोवा का हुक्म निर्मल सै, वो आँखां म्ह

रोशनी ले आवै सै।