1 Kuli zuwa alyo hegwe kolonga,

"Ndokutogola, gwa Mkulu Nguluwi,

hanga aho hamwande nakunzudila,

ila sambi ng’halazi ya hegwe ya kutali na heni,

nagwe nakunyhembuliza.

2 Ndikomya Nguluwi ndo ulohozi wa heni,

ndochitumbila kwa heye ne kudumba.

Mkulu Nguluwi ndo mong’ho wa heni na lwimbo wa heni,

nakawa ulohozi wa heni."

3 Mosangalala kwa chiwalo cha ulohozi,

kota munhu yawele na ng’halu kudeha mazi kulawa kuli mideho.

4 Kuli zuwa alyo hegwe kolonga,

"Ulonje malumbo kwa Mkulu Nguluwi, ulicheme itagwa lya heye,

uzelese kwa wanhu wa isi gala goyagaditile,

uwikule itagwa lyake kota ndo likulu.

5 Umwimbile Mkulu Nguluwi, kwa vila nakadita mbuli ng’hulu,

ali lizeleche kuli isi yeng’ha.

6 Utowe iyowe, wimbe kwa usangalalo, hegwe munhu wa muji wa Yelusalemu,

kwa vila mkulu hali hegwe, ndo Nguluwi, yawele Yelile wa Isilaeli."