Salmos 4

1 פֿאַר דעם געזאַנגמײַסטער, מיט סטרונעשפּיל; אַ מיזמור פֿון דָוִדן.

2 אַז איך רוף, ענטפֿער מיר, דו ג-ט פֿון מײַן גערעכטער;

אין ענגעניש זאָלסטו מיר דערברײטערן;

לײַטזעליק מיך, און הער צו מײַן תּפֿילה.

3 איר מענטשנקינדער,

ביז װאַנען װעט מײַן כּבֿוד צו שאַנד זײַן,

װעט איר ליב האָבן נישטיקײט,

װעט איר זוכן ליגן? סֶלָה.

4 אָבער זײַט װיסן, אַז ה׳ שײדט אָפּ זײַן פֿרומען,

ה׳ װעט הערן אַז איך װעל רופֿן צו אים.

5 ציטערט און איר זאָלט נישט זינדיקן,

באַקלערט אין אײַער האַרצן אױף אײַער געלעגער,

און װערט אַנטשװיגן. סֶלָה.

6 שלאַכט שלאַכטאָפּפֿער פֿון גערעכטיקײט,

און פֿאַרזיכערט אײַך אױף ה׳.

7 פֿיל זאָגן: װער װעט אונדז װײַזן גוטס?

ה׳, הײב דאָס ליכט פֿון דײַן פּנים אױף אונדז.

8 האָסט מיר געגעבן מער שׂימחה אין האַרצן,

װי בעת זײער תּבֿואה און זײער װײַן זײַנען פֿיל.

9 בשלום װי איך לײג זיך אַזױ שלאָף איך אײַן,

װאָרעם דו ה׳ מאַכסט מיך װױנען באַזונדער אין זיכערקײט.