1 Nabureme, aganbabéi nafurieidun;

chülüla nagúaragun bumoun!

2 Maramudabei bigibu nuéi dan le nidiheri nan; aganbabána!

Óunababana furese dan le nagúarun bun!

3 Ladüga lagumuchaguña nibagari

kei lagumuchagun gumuleli;

gemeti nabu kamá leñegura watu;

4 ábürühatu nanigi kei híduru sáühali;

mabusenrungubeitina ni lun neigin!

5 Badületi nura luagun nabu lárigi namumehan.

6 Ítara niña kei duguyu le lídanbei fulasu mageirawati,

kei aban garún lidan günringuaü.

7 Marumuguntina.

Ítara niña kei aban dunuru lábugua tábulugu muna.

8 Meredeti hanabagunina náganiñu,

yusu haméi niri kei íñarawaguni.

9 Hóutina baligi teweñegua fein;

gubuguati náguira tidan nuniñe,

10 ladüga basafaragun luma bagañidun numa,

iñura bumutina lun báhuchurunina lárigiñe.

11 Sügüti burí nuéyuri kei lamuñounga;

ásaüreinaniña kei híduru.

12 Gama lumoun buguya Aburemei, barúeihaba súnwandan;

laritawaguba luagun biri súnwandan!

13 Iñuraguabá, gudemelá Sión bun,

ladüga gúnfuliha dan;

óuraali lun feruduna bani!

14 Hínsiñe buriti hadübüri bánigu houn;

gagarigutiña luagu lagünrinchawagun!

15 Sun gürigia hama sun urúeigu ubouagu

híchuguba uéiriguni lun liri Aburemei

16 danme le lararamagüdüni Sión lárigoun

danme lachülaagun lidan luéirigun;

17 danme letenirun lun lafurieidun le igirúaalibei,

mígirun ligíame laganbuni layumuragun.

18 Bürüwalá katei le habá iseri inebanfangu

lun híchugun ha mágurahoungiñabaña uéiriguni

lun Aburemei danme hayabin ubouagun.

19 Ariha lumuti Aburemei múa siélugiñe;

20 lun letenirun lun hayahun adaürǘtiña,

lun lesefuruniña ha siádiwaañabaña lun óunweni;

21 lun laguarahóun luma lun leremuhóun

liri Aburemei Sión luma Herusalén.

22 Danme hóundaragun sun hawuyeri

gürigia lun háhuduragun lun.

23 Gidaali lídangiñe nere lidan yebe nibureingidina,

chátigüdatima laali nibagari.

24 Ariñagatina lun:

«Nabureme, manügabána lamidangua nibagari».

Mébehaburiti birumudiri!

25 Derebugugüda bumuti múa lúmagiñe furumiñeti dan;

buguya guánarügü adügübalin sielu.

26 Sun ligía lagumuchaguba,

anhein buguya ñeinmemebadibu;

sun ligía lawesiruba kei daüguaü;

basansirubaña ábame herederun sánsiguañu

kei gürigia ha asansirutiña hadaüragun!

27 Ánheinti buguya, buguyamémegidibu

magumuchadibei birumudiri.

28 Bíchuguba achoururuni houn hadügawagun bubueingu;

bíchuguba ubaraü houn biñuarü.