1 Nubungiute, aganbabéi nafurieidun;

míchigaba mabahüdüni lun nayumuragun:

2,3 Beresebá nau, óunababana;

wátina buagu lidan nidiheri.

Adadagaragüda lumutina lumalali nágani

luma hagúaragun wuribatiña.

Buíngüda hamaadina lau idiheri,

ábürühatiña nuagun lau anarimeni.

4 Ádühatu nanigi nidan le nanufude;

ábürüha ligía lanarime anufudei luéi óunweni nuagun.

5 Beluhali aban lanarime anufudei nidoun;

nadadagaruña lau anufudei!

6 Nariñagati:

«Garünadügü au hamuga kei unhun;

aba hamuga náhamarun lun nemeraagun.

7 Nídiña hamuga dise lidan náhamahan;

nerederuña hamuga aganóua lidan fulasu mageirawati.

8 Néibaaguña hamuga furese

aramudagua luéi lere garabali

luma luriban dan».

9 Günringuabaña Aburemei,

fánreinguabei hererun,

ladüga marihintina amu katei luéi

anarimeni luma gáganiguaü,

10 geyeguhaña lau uburugu áriebu wéyuagu.

Anihein wuribani luma gáganiguaü fulasurugu:

Anihein féridiguaü ñein;

11 buin liña burí lémeri lau

anarimeni luma iyeeni!

12 Anhein hamuga ábanti ágani anabagubalina,

nawanduñein hamuga lira,

anhein hamuga ábanti le iyereehabúbei nun

iñuragubei lungua nuagun,

naramudaguña hamuga giñe luéi.

13 Buguya guánarügü adügübalin lira,

buguya le meni numada,

buguya numada le tímatimaati,

14 le burí meha úmabei nóundaragua lúbiñe Bungiu

lun wayanuhan keisi umadagu,

buguya le meha burí úmabei néibuga hadan saragu gürigia.

15 Ábürühala óunweni hawagun náganiñu!

Ábürüha hamá wínwanñu lidoun umúahaü,

ladüga anihein wuribani tidan hanigi!

16 Anhein au náwarubei Bungiu;

lesefurubadina Nabureme.

17 Namumehaba ayahua aume binaafin,

rábounweyu luma áriebu,

ani laganbubei numalali.

18 Lesefurubadina wuriburugu;

areidaleime nibagari

íbini anhein gibe habéi náganiñu.

19 Bungiu le arúeihabei sun dan,

laganbubadina, ani lǘnabudaguagüdübaña;

ladüga masansirun hamuti hagaburi

manufudetiña giñe luéi Bungiu;

20 Iñura hamuti háhabu kóntüra hamadagu;

magunfuliruntiña lau hadaradun le lánina umadaguaü.

21 Ñulugüda hamuti burí hererun sügǘ lau beru,

gama lumoun sun hasaminan luagun wuribu;

yúsutiña dimurei burí le ñuluti sügǘ lau garaba,

mama amu katei tuéi eféin hamanatu.

22 Ígirabei bidiheri lun Aburemei,

ábame líderagunibu;

mígirunbei lun héiguadun gürigia

ha gaganbadibaña lun.

23 Nubungiute,

ha gáfarahadibaña ye hagía,

mabagaridunhabei ni lamidan habagari;

bábürügüdübaña lidoun umúahaü,

ánheinti au hemenigitina buagu.