1 Nalawahabei Nabureme tau sun nuani;

nalawahabei liri Bungiu le sándubei lau sun núgubu.

2 Nalawahabei Nabureme tau sun nuani;

mabulieidúnbadina ni aban

lídangiñe sun ubuiduni le ladügübei nun.

3 Ligía ferudunabalin sun nuriban;

ligía areidaguagüdübalin sun nisandi;

4 ligía esefurubalin nibagari lídangiñe umúahaü;

ligía abuinchagüdübalina lau ínsiñeni luma areiduni;

5 ligía agufurumadagüdübalina lau sun le buítimabei,

adüga ligía lun nibureinmémebadina lan

ani here kei aban ágila.

6 Ha asufurirubaña anarimeni,

aguseragüda lumutiña Aburemei

lau irichaü le tímatimaati.

7 Subudigüda lumuti lémeri luma

burí katei le ladügübei lun Moisesi

luma houn Ísüraelina.

8 Areidati Aburemei, gudemehabu ligia;

gaguraasunti giñe hínsiñehabu ligía.

9 Madeinhanti woun sagü dan,

madurati giñe ligañi lun súnwandan;

10 mabeichun lumutiwa Bungiu keisi le wadünabei

mafayeihángüdalawa luagu wariban luma wafigoun;

11 wéiriti línsiñehabu houn ha inebehabubaña

ítara kéisigubeirügü lueirin sielu lóugiñe múa.

12 Dísegüda laali wafigoun wawéi,

kei ladisedagüdüni labouchagüle weyu luéi lálüdagüle.

13 Areidati Aburemei houn ha inebehabubaña lun

kei ligaburi aban úguchili hama lirahüñü;

14 subudi lumuti ka lan wabuñabei

káteitimañadiwa lan:

Subudi lumuti buidu, luagu múa lan wabuñabei.

15 Ítara liña habagari gürigia kei híduru,

hüchati kei aban fuluri áraabuna:

16 Ítara kei láfuragun garabali luagun,

aba lagumuchagun,

ani ibidiñedigiaali luáguti ni ka un.

17 Ánheinti línsiñehabu Aburemei houn

ha íchugubaña inebesei lun, magumuchaditi;

mébehati lirichadüna hadan sun hadügawagun,

18 ha agunfulirubalin lidaradun,

mabulieidagun hagía luéi houdin

lau le lubeibei lugumadin.

19 Ru laali Aburemei lálana larúeihan sielu,

gabafuti larúeihan luagu sun katei.

20 Alawaha huméi Aburemei, ánheligu gabafutiña!

Huguya le agunfulirubalin lererun,

huguya le aranseñubei lun hidin lau le lubeibei.

21 Alawaha huméi Aburemei sun huguya lisudaranigu,

ha eseriwidubalin, adüga huméi lugundan!

22 Alawaha huméi Aburemei sun huguya ha ladügübaña,

lidan sun fulasu le lánina larúeihan!

Nalawahabei Nabureme tau sun nuani!