1 Sefubána Nubungiute,

ladüga yarafaadina lun nañaradagun;

2 nabuluchuña lidoun aban suanpu huliliti,

ani madaritina halíaba lan nadagaragüdei nugudi.

Chülühadina lidoun lilulin-agei duna

ani laduruguduñadina ébeini.

3 Ñalá nagülerugu lárigi lere nagúarahan;

gáriha sun nagülerugu;

Buchá luagu nagu lárigi nilü agurabahei Nubungiute!

4 Gíbetimatiña náganiñu mébunouga

sügǘ lau ídiburi le nábulugubei;

gíbetimahaña ha iyereehabúbaña nun,

ha agünrinchagubalina mébunouga.

Fosu hamutina lun náguyugüdüni le míweruhan nubéi.

5 Nubungiute,

subudi bumuti ida liña lan buga lueirin numaganbadin;

siñati naramuduni nifigoun buéi.

6 Nabureme, Bungiu Suntigabafu,

manüga hamá ha afiñebaña buagu busiganu luagu nidurun!

Habungiute Ísüraelina,

méiguadala harüna ha áluahabalibu, nuéigiñe!

7 Awandaadina anabawaguni buéigiñe;

buinha nigibu lau busiganu.

8 Ítara niña kei aban terencha

houn níbirigu guánarügü!

9 Lagumuchaguagüdüñadina nemeidin tau buban;

nuagun lábürüha hanabahan ha anabubalibu;

10 adügatiña bula nau dan le nayahun luma nayunarun;

11 au héheraagülebei sun hagía

dan le nadaürün daüguaü lánina ludu.

12 Hayumuluguñadina sun hagía,

eremaagua hamana bacharuatiña.

13 Gama lumoun au, Nabureme, wa numutibu,

Nubungiute; íderaguabana guentó!

Luagu lueirin bínsiñehabu; óunababana!

Luagu merederadi lan bídehan, sefubána!

14 Mígiraba lun nabuluchun lidan suanpu!

Sefubána hawéi ha iyereehabúbaña nun

luma lídangiñe lilulin duna.

15 Mígiraba lun laduruhanina ébeini!

Mígiraba lun láhuluchunina fuludu,

ñéingiñeme ladouragua nau!

16 Nabureme, óunababana;

buítibu, hínsiñehabu buguya!

Luagu lueirin bugudemehabu, arihabána;

17 mágurabana au le bubuein!

Óunababana furese ladüga lídanñadina denchaü!

18 Yarafabá nun, sefubána;

sefubána hawéi náganiñu!

19 Subudi bumuti anabawaguni,

luma busiganu le awanda náalibei;

subudi bumuti kátaña lan náganiñubaña.

20 Bóuguala anabawaguni nanigi;

maguraasunhadina, mere nuguya!

Áluahaadina kaba lan íchiga gurasu nun,

luma kaba lan gudemehabu nun.

21 Rútiña abiñaragülei lidoun neigin,

dan le namagürabudun aba híchugun binigá nun.

22 Garabagualá hadabulan

luma burí heigin le lánina umadaguaü lun sádarame houn!

23 Adügabá lun herederun marihinga

luma lun ladadagarun hayada súnwandan!

24 Rariguagüdabei bigañi hawagun;

ragülaña ligeme bigañi!

25 Günrinwaguatá hakianpun-agei

merederalá ni aban tidan burí hakianpun;

26 ladüga éibaaha hamuti le nidiheribei

adüga hagía bula lau ligarigu le babeichubei.

27 Águyugüdaba wuribani luagu wuribani houn;

ualá feruduna bániña!

28 Gidabaña tídangiñe liliburuna ibagari

míchigabei hiri tidoun gárada to

ñein lubéi hiri ha richaguabaña!

29 Ánheinti au, le sándibei ani nidiheri nuguya,

iñuraguabana, Nubungiute, sefubána.

30 Nalawahabei liri Bungiu lau uremu;

nalawahabei lau eteingiruni.

31 Gúndaatimabei Bungiu lau lira

sügǘ lau nadagaragüdün aban bágasu lun

odi aban lan bágasu lau ganchu luma lúbara ugudi.

32 Ha nidiheribaña,

hagundaaruba lau harihini katei le,

ábame tárügüdün hanigi ha áluahabalin Bungiu gurasu;

33 ladüga aganba lumutiña Aburemei gudemetiña

ani mágurun lumutiña lánigu ha adaürǘbaña.

34 Alawahalei sielu, múa luma barana Aburemei,

luma sun le burí aganóubei lidan!

35,36 Lesefurubei Bungiu Sión

ani lararamagüdayabei burí luburugute Hudá.

Halagantebei hasaanigu lubúeingu Bungiu uburugu;

ñeinba haganóua ábame hagíaaña lan laburiña;

haganóuba ha hínsiñehabubaña lun Bungiu ñein!