1 Nabureme, sefubána hawéi salufuritiña,

gama lumoun góunigitimabana hawéi gürigia hanarimetiña,

2 hawéi ha aritagubaña wuribani,

agubuha hagía wuribu súnwandan.

3 Gágiritu hañeñe kei tiñeñe hewe;

ítara liña burí hererun kei tupeisinin hewe.

4 Nabureme, góunigibana luéi habafu wuribatiña,

gama lumoun góunigitimabana hawéi gürigia hanarimetiña,

hawéi ha aransehabaña lun héiguadagüdünina.

5 Sétihaña pántatiña hagía sádara nubá;

rúhaña seni luma gúrudu nubá;

rúhaña sádara nubá laru üma.

6 Ariñagaadina lun Nabureme:

«Nubungiute buguya;

aganbabéi lubeiti, nagúaragun ayumuragua!

7 Nabureme, Nabureme, nesefuragüle gabafuti,

góunigi bumutina wuriburugu».

8,9 Nabureme, míchigabei layumahan salufuriti lun;

mígiraba lun lawanserun laransehan.

Mígiraba lun hagañeiruba lan náganiñu,

adügabá lun lábürühan híñaragun guánarügü hawagun!

10 Ábürühala garubun gemeti hawagun;

fui hamaña lidoun fusu

le ñéingiñe lubéi máfuridundigiaaña lan.

11 Merederalá le wíyebei ererun ubouagu;

éibaahalei wuribani le hanarimebei lun lagünrinchaguni.

12 Subudi numuti luagu adüga lan Aburemei

irichaü houn gudemetiña

abuyeiha ligía luagu le yuubei houn ha nidiheribaña.

13 Halawahabei gürigia harumatiña biri;

haganóuba gürigia úaraguatiña biñuarü!