1 Nabureme, gagibuguabá hama ha agagibudagubaña numa;

bageindagua hama ha ageindagubaña numa.

2 Daüboun badaüragun lánina wuribu

barübéime bidaüdina lauti gürabu,

higabu bíderaguana,

3 barübei barufunte,

ráramabaña ha éibaahabalina;

ariñagabá nun luagu buguya lan nesefuragülebei!

4 Anuraha hamá lau busiganu ha busenbaña háfarunina;

anuraha hamá lau busiganu ha busenbaña hadügün wuribati nun;

5 ítara hamá kei ifei le lanügübei garabali,

danme lachagaruniña lani Aburemei ánheli!

6 Búrigala hémeri, guyé ligíame,

danme léibaahaniña lani Aburemei ánheli!

7 Sétitiña sádara nubá mébunouga;

chigatiña huyu nubá mébunouga;

lun néiguadun lidoun.

8 Ábürühala lamiselu hawagun sódinirügü!

Ábürüha hamá tidoun guánarügü hasadaran!

Ábürüha hamá lidoun lamiselu!

9 Ábameti nagundaarun lidan Nabureme,

ladügame sefu láadina lan.

10 Nariñagame tau sun nanigi:

«Ka ítarabei kei Nabureme?

Sefu bumutiña ha gudemebaña hama ha mégeihabubaña

hawéi ha héretimabaña sügǘ hau,

ha amudiragubaliña».

11 Iñuraguatiña gefentiña salufuritiña,

aba hálügüdagunina luagu burí katei le ibidiñeti luáguti nun.

12 Fáyeihaña buiti nun lau wuribati

ma lueirin íruni nuagu luéigiñe lira!

13 Lau sun lira, dan le meha sandi hamá,

dáüguatina daüguaü lánina íruni;

rédeitina méiginga ladüga nigarigu,

aba nerederun afurieida nídangua.

14 Rédeitina lau íruni luma maguraasuni,

kamá hamuga namuiseruña tárigi núguchu,

o lárigi lan aban numada odi aban níbiri.

15 Gama lumoun dan le nábürühanbei,

sun hagía, aba héherahan nau lidan aban;

óuseragua hamutina saragu

kamá hamuga gürigia terencha hagía, ha ibidiñetina houn.

16 Buchagüdatiña nuagu, adaaguatiña bula nau,

aríagua hamutina lau arihini le lánina iyereehabúni.

17 Nabureme, átiribei san dan bau arihei katei le?

Sefubéi nibagari le ábanrügübei,

hawéi liñún ha adürürühabaña nubaroun!

18 Neteingirubadibu hagibugiñe saragu bumutuniña;

nalawahabadibu hañúarü saragu gürigia!

19 Magundaaragua hamá náganiñu nau;

mámuruhan hameime ha iyereehabúbaña nun hagu mébunouga.

20 Hagía máluahan hamuti darangilaü,

aranseharügütiña wuribani

habá gürigia darangilutiña ha lílana fulasu;

21 ma lueirin háwagachun lun hariñagun nuagu:

«Ariha huméi le ariha wamaalibei!»

22 Gefentibu luagu lira, Nabureme!

Merederabá maniñu! Madisedabá nuéi!

23 Saraba, Nabureme Nubungiute,

agaguduabá! Rubei niricha nun, númagiñeba.

24 Aguseragüdabana Nubungiute

úaragua luma biricha.

Méheraha hamá nau!

25 Mariñaga hamá masaminarun hagíame:

«Anihán buga le wabusenrubei!

Günringua wamá sunsuinagubei!»

26 Ha gúndaabaña lau nasufurirun

redei hamá lau busiganu,

redei hamá lau busiganu le gumuti

ha íñugubei hasandiragun houngua nuéi.

27 Gama lumoun gunda hamá, wagua hagíame lau ugundani

ha busenbaña harihin nagañeirun;

ariñaga hamá súnwandan:

«Wéiriguti Aburemei, ani gúndaati

lau buidu lan lidaani lubúein!»

28 Nadimurehaba luagu biricha tau niñeñe;

nalawahabadibu sun weyu.