1 Bungiu waramudaguagülebei, ligía giñe wérebei;

ligía íderagubaliwa lidan nidiheri wamá.

2 Ligía manufudebadiwa lubéi íbini lagünrinchagun múa,

íbini labuluchun burí áraabu lidoun lilulin barana.

3 Manufudebadiwa

íbini ladürürühan barana, iñura ligía lugudi,

íbini ladadagarun burí áraabu lau ligañi.

4 Anihein aban duna éibaaguati

íchuguti ugundani lidan luburugute Bungiu,

le sándutimabei lídangiñe burí luburugute Bungiu.

5 Anihein Bungiu lamidangua uburugu ligía,

ani lágüdahabei Aburemei,

líderagubei Bungiu dan le lagumeserun arugada.

6 Áünhatiña néchanigu,

adadagarati burí arúeihani,

günringuati múa dan le laganbagüdüni Bungiu lumalali.

7 Anihein Aburemei Suntigabafu wama!

Lubungiute Hakobu waramudaguagülebei!

8 Higougu harihei katei wéinamuti

le burí ladügübei Aburemei ubouagu:

9 Gumuguagüdalá wuribu

chülǘ lumoun lagumuhóun larigeirugu ubóu;

halagualá burí gimara, günringualá burí eféin,

gudala burí karü to lánina wuribu.

10 «Deregegua humá hungua!

Subudi huméi luagu au lan Búngiubei!

Hóugiñeñadina sun néchanigu!

Lóugiñeñadina sun ubóu!»

11 Anihein Aburemei Suntigabafu wama!

Lubungiute Hakobu waramudaguagülebei!