1 Nabureme Bungiu, nilanpunbei

ligía giñe nesefuragülebei,

kábagia uei nanufudeda?

Sefu lumuti Aburemei nibagari,

kaba uei nanufudeda?

2 Óundaraguatiña, náganiñu, wuribatiña,

lun hagayuahan nuagun luma lun hagünrinchagunina,

gama lumoun hagía achugeragubaña aba héiguadun.

3 Íbini hegeyedagun saragu súdara nau,

manufudedunboun nanigi,

íbini haranserun lun hawuribuhan numa, darangilañunuba.

4 Ábanrügüñein katei namuriahan luma Nabureme,

ábanrügüñein katei nabusenrun:

Lun tidan nan luban Nabureme lidan sun nibagari

lun náhuduragun lun lúbiñe,

aríaguaneime lanarime lubuidure.

5 Danme liabin dan le wuribabei,

ladouraguba Nabureme nau;

ladouraguba nau tidan litenpulun

lesefurubadina ligibuagu aban dübü!

6 Ítara luba gayara lan niñuraguni nichügü hóugiñe náganiñu;

ítara luba gayara lan nadagaragüdün lúbiñe,

eremuha aume lun Nabureme lau agúarahani le lánina ugundani.

7 Nabureme, buma namuriaha: Aganbabána.

Gudemená bun, óunababana!

8 Tariñahare nanigi nun:

«Áluahabei liñúarü Aburemei»

náluahañadibu lubeiti Nabureme.

9 Maramudaguabá nuéi!

Mabugunbáname lau bigañi!

Buguyarügüñein íderaguana!

Mígirabana nábugua,

buguya Nubungiutebei luma Nesefuragüle.

10 Íbini yebe lágurunina núguchi tuma núguchu,

lau sun lira labudubadina Nabureme.

11 Nabureme arufudabéi bémeri nun,

alidihabana lidoun üma le surubei hawéi náganiñu;

12 mederegerabana háhaburugun náganiñu,

ladüga iñuraguaaña gefentiña marasualugutiña

ani hanarimetiña nuagun.

13 Gama lumoun chóuruguatina nungua

luagu lachülürüba lan dan lun narihini lugundan Nabureme

lidan limigifen ibagari le.

14 Afiñebá luagu Aburemei!

Ganigibá, mábürühala barüna!

Afiñebá luagu Aburemei!