1 Agúahatina lun Bungiu

lau umalali héreti lun laganbunina.

2 Weyu le hiru nan, áluaha numuti Nabureme,

memeraaguntina luéi niñuruni núhabu

afurieida lun sagü áriebu.

Madaritu nuani gurasu.

3 Haritaguatina luagun Bungiu, aba nayahun;

rédeitina asaminara, aba lábürühan narüna.

4 Nabureme, mígiruntibu lun nadouruni nagu;

wéiriti nidiheri, darí lun siñá lan nadimurehan!

5 Saminatina luagun dan le sügühalibei;

6 haritaguatina luagu dan meha burí neremuhan áriebu.

Saminatina nídangua, nariñaga:

7 «Lerederuba funagia Aburemei gáñiñu súnwandan?

Marufudunya lubéi funagia lareini woun?

8 Gumuha funagia línsiñehabu?

Gumuha funagia lidaradun wama?

9 Bulíeigua funagia Bungiu luéi lareini?

Wéiriti funagia ligañi darí lun magudemehabuhaali lan?»

10 Létima gáribei nun,

naritagun luagu mítaranhaali lan le Íñugutimabei wama

kei meha lubaramegiua.

11 Naritagubei burí katei buiti

le meha ladügübei Nabureme lidan dan lügüra,

12 nasaminaruba luagu sun le ladügübei.

13 Bungiu, sánduti burí bémeri;

ka bungiu wéiribei kei buguya?

14 Buguya Búngiubei le adügübei katei wéinamuti!

Arufuda bumuti bubafu houn néchanigu!

15 Sefu bumutiña bánigu lau bubafu,

ha lirahüñü Hakobu hama lirahüñü Hosé.

16 Bungiu,

dan le larihinbalibu barana, hanufudeguati;

aba burí ladadagarun lilulin-agei lidunari;

17 ígiragüda lumuti burí dúeri huya,

adürühati wayuhuru siélurugu,

luma labirihaniga lidan sun fulasu.

18 Aganbúati bani wayuhuru lidan garabali héreti;

harugoungati ubóu lau labirihaniga;

aba lánhingichuni hárabaganali múa.

19 Sügütibu labadinaguagiñe barana;

hiñuguatibu saragu duna,

gama lumoun úati ni aban adariruti bugudárigi.

20 Alidihagüda bumutiña bumutuniña

lun Moisesi luma Aarón keisi Mudún.