1 Alawaha huméi Aburemei!

Buiti lawarúniwa uremu lun Wabungiute!

Lunti leremuhóun uremu bímeti lun!

2 Bunaguaya lumuti Aburemei Herusalén

óundaragualaña lánigu Ísüraeli ha chagagubaña.

3 Agaranihati houn ha sándibaña anigi,

güragualei biti le hawagubei.

4 Ligía ariñagubei átiribaña lan meha waruguma

ru ligía tiri kada aban.

5 Wéiriti Wabungiute, weiri ligía lubafu;

mébehati lualin lichügü.

6 Iñuragua lumutiña Aburemei ha gudemebaña,

gama lumoun ǘnabugüda lumutiña ha salufuribaña.

7 Heremuha lun Aburemei lau eteingiruni;

heremuha uremu lun Wabungiute lau tamuri árüpa.

8 Darugua lumuti sielu lau dúeri,

adüga lumuti huya lun láhuyuni múa,

hüchagüda lumuti híduru luagu wübü,

9 hóugüda lumutiña animaalugu

hóugüdalaña harahüñü sanadi dan le hayahun.

10 Mama lere gabayu ni lere wügüri

hínsiñetimabei lun Aburemei;

11 ha inebehabubaña lun,

hagía áubaña lagundaara,

ha hemenigibaña luagu línsiñehabu.

12 Herusalén, balawahei Aburemei,

Sión, balawahei Bubungiute.

13 Ligía ámurudubalin lidaünda bubenari

biniláña sun birahüñü lurageirugu uburugu.

14 Ligía anügübalin darangilaü buburuguterugun,

gufurumagüdalabu lau lubuidun-agei türigu.

15 Óunaha lumuti lererun lidoun múa,

ani éibaaguati lererun furese.

16 Adüga lumuti niewe kamá hamuga tura mudún,

afuruha lumuti serenu kamá hamuga kaliki.

17 Óunaha lumuti yelu kei lúbara huya dereguati;

lau lidiliga le lóunahabei dereguagüda lumuti duna.

18 Gama lumoun óunaha lumuti lererun,

aba larürüdaguagüdüni;

fúgüda lumuti garabali, aba léibaagun duna.

19 Subudigüda lumuti lererun lun Ísüraeli,

rulei lugumadin luma lilurudun lun Hakobu.

20 Madügün lumuti ítara houn híbiri néchanigu

ha masubudirunbalin lilurudun.

Alawaha huméi Aburemei!