1 Nabureme, aganbabéi nikesin le richabei,

aganbabéi nagúahan ídemuei,

rubei barigei lun nafurieidun,

ladüga mama lídangiñe iyumaaru le marasualuguti láfurida.

2 Búmagiñela liabin nasiadirúniwa,

ladüga subudi bumuti katei le richaguabei!

3 Beluhadibu lidoun nisaminan;

ñǘbuinhadibu aríaahana áriebu;

hóuchagua báadina lau watu gemeti,

madaritibu wuribani nidan.

Mariñagungidina burí katei le moun lumuti

4 kei hadüga híbiri,

díreihadina luéi émeri le lánina anarimeni,

kei le aubei lariñagei bilurudun.

5 Deregüdagumemeniña lidan bémeri,

úagili agidarutina ñéingiñe.

6 Bungiu, iñura numuti numalali bun,

ladüga óunaba bumutina;

tenibá nun, aganbabéi le nariñagubei bun.

7 Furangulá barufuduni bínsiñehabu;

séfuñuwaña bóubawagu hawéi wáganiñu.

8 Góunigibana kei lila bagu;

daruguabá nau lau barüna,

9 hawéi wuribatiña ha álugubaña hábürühan nuagun,

hawéi áganiñu gáfarahatiña ha geyegubaña nau!

10 Barüguatiña houngua,

íñuguti hadimurehan;

11 ayarafahóuaña nun,

agurabei dan lun hágurunina múarugun.

12 Ítara haña kei liñún,

ha aranseñubaña lidan haramudaguagüle

aguraba hachubarun luagun háliru.

13 Iñuraguabá Nabureme, gagibuguabá hama!

Huduguagüdabaña!

Sefubána luéi le salufuribei tau befeinte;

14 sefubána hawéi lau bubafu, Nabureme;

sefubána hawéi wügüriña lánina ubóu le,

chagabaña luéi ubóu le,

le halagantebei lidan ibagari le!

Ígiraba lun lagibedagun harisin,

hou hamá hasaanigu darí hafaünchün,

ígiragua ligíame houn habañan.

15 Ánheinti au,

buídurügübei nun láurügü narihinibu igibu luma igibu;

lau nadariragun nungua bigibugiñe danme le nagagudún!