1 Nabureme, bóubawagu náluaha naramudagun,

mígirabana wuriba!

Sefubána ladüga surutibu!

2 Ruba arigei lun nebegirun;

furesebá besefuraname guentó!

Buguyalá dübü le naramudaguagüle,

abanbá aramudaguagülei nun,

le ñein lumuti chouru nan lun nesefurun.

3 Buguya dǘbübei le naramudaguagüle.

Alidihabana góunigibaname;

ruba inebesei lun biri.

4 Sagabana tídangiñe sádara to esetirúboun nubá!

Buguya óunigirubalina;

5 derege numutu nuani búhaburugu;

sefubána Nabureme, Lubungiute inarüni!

6 Iyereegutiña ha áhuduragubaña

houn guáriua meseriwíntiña nun;

ru naali nemenigin luagu Nabureme.

7 Barüti bínsiñehabu ugundani nun.

Ariha baali nirun, subudi bumuti nidiheri.

8 Mederegerun bumutina lúhaburugun nágani;

láramagüda bumutina lidan aban fulasu le chóuruti.

9 Nabureme gudemená bun,

ladüga lídanñadina denchaü;

edebilideina liña nagu ladüga igari,

emeredeina liña giñe sun núgubu.

10 Lagumuchuña igarigu luma ayahuni lau nibagari!

Lagumuchuña íruni lau nere;

emeredeina liña núgubu!

11 Au héheraagülebei náganiñu,

lébuna habulan nubesinanigu,

katei mínsiñeguti au houn ha subudihabúbaña nun.

Ha arihitina ǘmadarugu, anurahatiña nuéi!

12 Bulíei hamaadina sunsuinagubei,

kamá le hamuga hilaadina,

bulíei hamaadina kei aban fudu le amurusuhóuaali.

13 Aganba numuti hagülülühan gürigia:

«Anihein lanarime anufudei lidan sun oubaü».

Eledeguatiña nubá kei ábanrügü gürigia,

aransehatiña lun háfarunina hilagubei.

14 Gama lumoun au Nabureme, buagu nemenigida,

ariñagaadina: «Buguya Nubungiutebei!»

15 Búhaburuguñein nibagari;

sefubána hawéi náganiñu ha éibaahabalina!

16 Arihabá nuagun lau bareini, au le bubuein,

sefubána lau bínsiñehabu.

17 Bun nagúara, Nabureme;

madügabá lun néiguadun lidoun busiganu!

Héiguagüdabaña ha salufuribaña lidoun busiganu,

héiguagüdabaña lidoun límaniga le lídanbei umúahaü!

18 Rédeila iyumaaru burí le yeebei maniñu,

le burí adimurehabei lau bula

luma lau luriban dimurei hawagu amu,

ani anabagualaña gürigia ha harumabaña.

19 Ma lueirin bareini houn ha íchugubaña uéiriguni bun!

Areida bumutiña kei aban katei gebegiti saragu,

afanreinhabei areini ligía,

hagibugiñe gürigia ha hemenigibaña buagu.

20 Salba bumutiña hawéi gürigia wuribatiña

lau bareiduniña biñuarü;

daruguatibu hau lábugiñe bamuñadagüle

luéi hanabaguniña háganiñu.

21 Alawahoualá Aburemei le adügübei burí katei wéinamuti

nuagu lidan nidiheri.

22 Lidan luriban nadariragun nungua,

haritaguatina yebe luagu fuíbaadina lan,

gama lumoun dan le namuriahanbei buma lun bíderagunina,

aganba bumuti nagúaragun.

23 Hínsiñela Aburemei houn sun ha gúnfulibaña luma,

góunigi lumutiña ha furangubaña,

ánhaña ha íñubei hanaagun houngua

ru lumuti hafayeiruaha houn luagu sun le hadünabei.

24 Sun huguya ha hemenigibaña luagu Aburemei

here humá gaguraasun huguyame.