1 Magañidabá hadüga salufuritiña,

magimugadabá giñe houn ha adügübaña wuribani,

2 fureseti hásaürün kei ubanaü;

hilatiña kei híduru!

3 Hemenigibá luagu Aburemei,

adügabéi le buídubei,

babagarida ubouagu,

gúnfuliba súnwandan.

4 Gundaabá le tímatimaati lidan Aburemei,

ábame lagunfuliruni tayumahan banigi.

5 Rubei bibagari lúhaburugun Aburemei;

hemenigibá luagu, ábame liabin lun líderagunibu.

6 Larihagüdübei bísurun luma biricha

kei lasandirúniwa lisü weyu amidirugu.

7 Maniba liñúarü Aburemei

bagurabahame lau gurasu darí líderagunibu.

Magañidabá hawagu ha buídubaña lidin houn lidan habagari,

ha aransehabaña lun hadügün wuribani.

8 Ígirabei igañi;

magañidabá ladüga gádeirügü lumutitima agañiduni sun katei.

9 Lidan linarün katei,

habugúba wuribatiña fulasurugugiñe,

ánhaña ha hemenigibaña luagu Aburemei,

hagíaba laburiña múa.

10 Málühaña ánhaña ua wuribatiña,

gayaraabei báluahaniña, ani madaribubaña.

11 Ánhaña ha ǘnabubei hanaagun houngua,

hagíaba laburiña múa,

habagariduba lidan darangilaü le dayarüti.

12 Áluahatiña ha salufuribaña hadügün wuribani houn ha buídubaña,

aba haríaguni lau arihini le lánina iyereehabúni.

13 Gama lumoun éheraharügüti Aburemei

ladüga subudi lumuti luagu yarafaali lan hadaani ha salufuribaña.

14 Sagá hamutu wuribatiña hefeinte,

seti hamóun hagimaran lun hábürügüdüniña ha gudemebaña,

hama ha ǘnabugubaña,

lun giñe háfaraguniña ha buídubaña óuserun!

15 Gama lumoun tebeluruba hefeinte guánarügü tidoun hanigi,

halagua tuguyame hagimaran.

16 Murusun katei le hámabei gürigia buítiña,

buítimati sügǘ lau saragu harisin ha wuribabaña.

17 Ladüga lagumuchaguagüdübaña Aburemei ha salufuribaña,

gama lumoun lágüdahabaña ha buídubaña.

18 Góunigi lumutiña Aburemei ha harumabaña abagaridun,

ani lerederuba halagante lun súnwandan.

19 Lídanme luriban dan,

danme ñein lan ilamaü mabusigaridunbaña,

ladüga géiginbaña lan.

20 Háguduba wuribatiña kei híduru sáühali,

hagumuchaguba láganiñu Bungiu kei gumuleli.

21 Amuriahatiña ha salufuribaña furedeiti, ani mafayeihantiña,

ánhañati ha buídubaña, gudemehabutiña, areidatiña giñe.

22 Ha labinirubaña Aburemei, galagantehabei múa,

ánhaña ha líñaragubaña, hagünrinchawaguba.

23 Adundeha lumuti Aburemei héibugun gürigia,

ru laña lidoun üma le aubei lagundaara;

24 íbini ánhaña éiguada,

meredebaña ítara héiguañu,

ladüga ragüñuliani Aburemei háhabu.

25 Nibureintina meha, guentó wéiyaadina,

ani marihingidina láguruniña Bungiu gürigia ha buídubaña,

marihin naña hasaanigu arihadiha.

26 Gudemehabutiña súnwandan, afuredeiha hagía;

aban abiniruni hasaanigu.

27 Disebá luéi wuribani,

adügabéi le buídubei,

ítara luba gabara ban súnwandan.

28 Ladüga hínsiñeti irichaü lun Aburemei,

ani mágurun lumutiña ha gúnfulibaña luma;

gama lumoun günringua lumutiña ha salufuribaña

mígirunti lun gadügawagun hamá.

29 Galangantehabei gürigia buítiña múa,

haganóuba giñe lidan súnwandan.

30 Gürigia ha buídubaña,

adimurehatiña lau lichú aau,

gürigia ha buídubaña,

adimurehatiña lau irichaü.

31 Barǘ hamuti larufudahan Habungiute tidan hanigi,

ligía miriraagunbei lubéi hagudi!

32 Aganariha hamutiña gürigia ha wuribabaña ha buídubaña

lun háfaruniña hilagubei;

33 gama lumoun mígirunbei Aburemei

lun hábürühan háhaburugun,

mígirunbei giñe lun híchugun hadurun.

34 Hemenigibá luagu Aburemei, aganbabéi,

liñuragubadibu, ruleime ageiraü bun balaganteme,

barihubei hagünrinchawagun wuribatiña lau bagu!

35 Ariha naali lanarime líñugun wuribati

ariha naali laweiridagun kei aban tídibu wewe hilumatu;

36 gama lumoun ñǘdünha, gumugua ligia;

áluaha numuti yebe, siñá numuti adarira.

37 Arihabáña gürigia ha harumabaña:

Darangilaü lunbei liabin houn.

38 Ánhaña ha wuribabaña hagünrinchawaguba sunsuinagubei;

agünrinchawaguniba ñübuin houn ha wuribabaña.

39 Lúmagiñe Aburemei liabin ídemuei houn gürigia buítiña,

ligía haramudaguagülebei lidan lidere dan.

40 Íderagua lumutiña Aburemei lun hesefurun.

Sefu lumutiña hawéi wuribatiña,

sefu lumutiña, ladüga lidan háluaha haramudagun.