1 Aburemei, buguya Bungiu le abeihabei,

arufudabéi bigañi!

2 Buguya aguseragüdütibei ubouagu!

Iñuraguabá bungua hawagun ha barüguabaña houngua,

fáyeigüdabaña luagu hadüga!

3 Ídaba san Aburemei,

ídaba san lásura hagundaarun wuribatiña?

4 Sun adügütiña wuribani héregutiña,

iñu buriti hanaagun houngua;

pántatiña lau le mámagubei!

5 Aburemei,

günringua hamutiña bumutuniña;

ru hamutiña bánigu lidoun ǘnabuguni!

6 Áfaragua hamutiña würiña

ha burí hilaguaañabaña úmarigu hama terencha,

áfaraha hagía méteñuhaña hilagubei.

7 Hariñagati luagu marihin lan Bungiu,

luagu mefén lan Lubungiute Hakobu luagu lira.

8 Gunfuranda humá, gürigia deré taganbun!

Ídaba san gayara lan gunfuranda humá?

9 Ida lubagia maganbun lan le adügübalin arigeirugu?

Ida lubagia marihin lan le adügübalin agu?

10 Bungiu óunigirubaliña néchanigu

ida lubagia mabeichun lániña?

Ida lubagia machú lan lau le arufudahabei houn gürigia?

11 Subudi lumuti Aburemei

luágurügüñein lan libidiounigan aau hasaminara gürigia.

12 Aburemei,

fuleseiwatiña gürigia ha beweridihabaña

arufudaha buguya houn,

13 darangilu hamaamuga danme le liabin luriban dan,

ánhañati ha salufuribaña, lachiahóuña fusu habá.

14 Mágurun lubaña Aburemei lumutuniña,

mígirun lubaña giñe lánigu hábugua.

15 Lagiribudayaba irichaü tidoun lúbaana aguseruni,

ábame hafalaruni gürigia ha harumabaña.

16 Kaba san ásaara lun lesefurunina

hawéi wuribatiña luma hawéi adügütiña wuribani?

17 Lun hamuga buga míderagun lánina Nabureme,

hilaadina hamuga.

18 Lidan yebe nariñagun: «Liriraaguatia nugudi»,

aba biabin Nabureme lau bínsiñehabu, íderaguana.

19 Labadinagua idiheri le agibedagubei nisaminanrugu,

rútibu dǘgüdaguaü nun luma ugundani.

20 Siñati gamada hamanibu aguseragüdütiña ha múaranbaña,

ha múaragunbei haguseragüdün luma lúrudu.

21 Ha eledegubaña lubá le madurunbei ani haruma ligía

aba hasiadiruni lun óunweni.

22 Gama lumoun, Nabureme naramudaguagülebei;

Nubungiute, ligía dübü le aramudubalina.

23 Ladügüba Aburemei lun lagünrinchaguniña

hariban guánarügü wuribatiña.

Lagünrinchagubaña Wabungiute!