1 Hínsiñeti Nabureme nun,

ladüga aganba laali lan nayumuragun;

2 ladüga ténihali lan nun.

Nagúahabei súnwandan!

3 Dahigua lumutina óunweni lidan lugurudun,

ragǘ lumutina ligarigu umúahaü,

sandiguatina nungua dáüwañu ladüga anufudei labu igarigu.

4 Ábati nagúaruni liri Nabureme,

aba nayumuragun lun, lun lesefuruni nibagari.

5 Richati Nabureme, gudemehabu ligia;

areidati Wabungiute.

6 Góunigi lumutiña Aburemei ha mégeihabubaña.

Dan meha le mere nubéi, sefu lumutina.

7 Anati guentó, gayaraayaali nasandiragun nungua darangilu,

ladüga buiti Nabureme numa;

8 ladüga sefu láadina lídangiñe óunweni,

ladüga sefu láadina luéi ayahuni luma luéi éiguaduni.

9 Gaganbadibadina lun Nabureme ya ubouagu.

10 Afiñetina meha,

lau súnñaha ariñaga nan luagu weiri lan nidiheri.

11 Buin lau anufudei aba nariñagun:

«Marasualugutiña sun wügüriña»

gama lumoun ni ítara meferidirun numuti nafiñen.

12 Ida lubá san nafayeiruni Nabureme

luagu sun buiti le adüga láalibei nun?

13 Niñurubei likopuna esefuruni

ábame nagúaruni liri!

14 Nagunfulirubei nani füramasei lun Nabureme

hañúarü sun lumutuniña!

15 Dereti lun Aburemei,

larihini hóunwegun ha hínsiñehabubaña lun.

16 Nabureme, bubuein nuguya!

Tiráü bubuein nuguya!

Hüchügua baali gúrudu le meha agüragubalina.

17 Le neteingirunibu nadagaragüdüba bun,

ábame nagúahani biri, Nabureme.

18 Nagunfulirubei nani füramasei lun Nabureme

hañúarü sun lumutuniña!

19 Lidan tibürürün buban Aburemei, to Herusalénboun!

Alawaha huméi Bungiu!