1 Aburemei, Warúeite sungua luagu,

ma lanarime luéirigun biri lidan sun ubóu!

Chülüti buéirigun yagürounmeme luéi sielu

2 ani irahüñü ñǘbürigiña

hama ha machularungiña eremuhabalin.

Adügatibu aban iderebugu hawéi báganiñu,

lun bagumuchun hau ha garabaguaañabaña buagun.

3 Dan le narihini sielu le badügübei,

luma hati hama waruguma ha bíchugubaña ñein,

4 aba nasaminarun núnguarügü:

Kátañanu san wügüriña lun basaminaruba lan hawagun?

Kátañanu san gürigia lun bebereseduba lan hau?

5 Adüga bumutiña kei yebe búngiugu,

rútibu uéiriguni luma inebesei geyegua hau,

6 rútibu ubafu houn luagu burí katei le badügübei,

ru bumutiña lóugiñe sun katei:

7 Hóugiñe mudún hama bágasu;

hóugiñe animaalugu ha áraabuna;

8 hóugiñe dunuru ha áhamahabaña sielu;

hóugiñe úduraü ha baranahabaña;

lóugiñe sun le baranahabei!

9 Bungiu, Wabureme sungua luagu,

ma lanarime luéirigun biri lidan sun ubóu!