1 Nabureme, buntia niñuroun nuani;

2 Nubungiute, buagu nafiñera;

mígiraba lun néiguadun lidoun busiganu.

Lun méherahan hamá náganiñu nau!

3 Manügalá ni aban hádangiñe ha afiñebaña buagu busiganu!

Barǘ hamá busiganu ha agarabaagubaña buagun.

4 Nabureme,

arufudabéi bémeri nun,

barübana luéigiñe bǘmate;

5 adundehabana, íchaahabana lidan binarün,

ladüga buguya Nubungiutebei, Nesefuragüle.

Buagu nemenigida súnwandan!

6 Nabureme,

haritaguabá luagu ínsiñehabuni luma gudemehabu

le arufuda báalibei woun súnwandan

7 gama lumoun maritaguabá luagu nifigoun,

ni luagu wuribati le meha nadügübei dan meha nibureingidina.

Haritaguabá nuagun, Bungiu,

luagu lueirin bínsiñehabu luma bareini.

8 Buidu liña Aburemei, richá ligia;

Arufudahati houn gafigountiña luagu lémeri,

9 adundeha laña ha ǘnabubei hanaagun houngua lidan lémeri;

arufudahati houn lidan irichaü!

10 Sun lémeri, lánina ínsiñehabuni luma inarüni

houn ha agunfulirubalin lidaradun luma lugumadin.

11 Aburemei, wéiriti nuriban;

ferudunabana luagu línsiñehabu biri.

12 Gürigia ha hínsiñehabubaña lun Aburemei,

arufuda lumuti Aburemei üma le lunbei hafalaruni houn;

13 awansegüda lumutiña lidan habagari

ru ligía fulasu houn hadügawagun.

14 Lumadagu Aburemei ha inebehabubaña lun,

subudigüda lumuti giñe lidaradun houn.

15 Súnwandan níchuguni narihin luagun Nabureme,

ladüga sefu lumutina luéi sun denchaü.

16 Arihabána, Nabureme, gudemená bun,

ladüga nábuguarügüñadina ani nidiheritina.

17 Eibu dan, éibutima nidiheri tan nanigi;

sefubána lídangiñe áhüchürüni.

18 Arihabéi nirun luma burí nasufurirun,

ferudunabéi nifigoun.

19 Arihabá hiibe náganiñu

ha asandirubaña iyereehabúni lánina óunweni nuagu.

20 Góunigi bana, sefubéi nibagari!

Mígiraba lun néiguadun lidoun busiganu,

ladüga buma náluaha nóunigiruniwa!

21 Góunigilana naruman luma madurun nan,

ladüga ru naali nafiñen buagu.

22 Nubungiute,

Sefubéi Ísüraeli lídangiñe idiheri.