1 Nabureme, aganbabéi nafurieidun;

tenibá lun nayumuragun.

Óunababana, ladüga richatibu ani gúnfulitibu!

2 Mabahüdabei nifigoun,

úati madurunti bigibugiñe.

3 Éibaaha hamutina náganiñu,

buregua hamaadina múarugu

fosu hamutina lun naganóun lidan luburiga

kei ha hilaguaañabaña lúmagiñe binarü.

4 Sandiguatina nungua lau óunwenbu maguraasuni,

ani ragüla márügüdaguni unguaü nanigi.

5 Haritaguatina luagun meha binadu dan,

ani saminatina luagun sun le adüga báalibei.

6 Bun nátulerei núhabu,

lau mágürabu bun, kei múa mábeiti.

7 Nabureme, óunababana furese,

ladüga agumuchagueina liña nuguraasun!

Mamaharabá bíderagunina,

ladüga nítaraduba kei hilaaña.

8 Subudigüdabana libügürü bínsiñehabu binaafin,

ladüga ru naali nemenigin buagun.

Subudigüdabei nun ida luba lan nóuserun,

ladüga buma nálugei le nayumahabei.

9 Sefubána hawéi náganiñu, Nabureme,

ladüga bóubawagu náluaha naramudagun.

10 Arufudahabá nun lun nadügüni bugundan,

ladüga buguya Nubungiutebei.

Barülana bani Sífiri le buídubei

luéigiñe aban üma suruti!

11 Luagu biri, Nabureme, gabagarigüdabana!

Ladüga richatibu, sagabana lídangiñe idiheri!

12 Ladüga bigunfulin, günringuabaña náganiñu!

Günringuabaña sun náganiñu,

ladüga bubuein au!