1 Nabureme Íñuguti,

buiti lichugúniwa seremei bun

luma leremuhóuniwa luagu buéirigun!

2 Ladimurehóun luagu lueirin bínsiñehabu binaafin,

luma luagu bigunfulin guñoun,

3 lau tamuri gidara,

luma lau tamuri sun tuwuyeri árüpa.

4 Nabureme,

gúndaaguagüda báadina lau burí katei le badügübei!

Buíngüda lumutina burí katei ligía lau ugundani.

5 Aburemei,

wéinamuburiti katei le badügübei!

Hénrenguti gunfurandawa lan bisaminan!

6 Ha derebaña aganbun

hagíarügüñanu siñá gunfuranda hamani!

7 Anhein weiri habéi wuribatiña kei híduru, awanse hagía,

lúnrügü hagünrinchawaguniwa lun sun dan lasusereda.

8 Ánheinti buguya Aburemei,

íñuñadibu súnwandan.

9 Bungiu, anihein aban katei inarüniti:

hagünrinchawaguba lan báganiñu;

hachagarawaguba sun ha adügütiña wuribati!

10 Gánwoungüda bumuti nere

kei lere aban bulu bágasu,

huruguabéi nichügü lau ibiñein

lun bíchugun inebesei nun.

11 Narihubei hábürühan náganiñu;

naganbubei hagúarahan wuribatiña hagía!

12 Egelewehatiña ha richaguabaña kei fáluma,

wéinamu hagía kei hibúari Líwanuna.

13 Bunawaguñuhaña tidan luban Aburemei;

egelewehatiña lidan libürürün Bungiu.

14 Haginduba íbini danme le wéiyaaña;

hérebaña súnwandan ani buin haba lau ibagari

15 aranseñu lun hadimurehan

luagu úaragua lan Aburemei.

Bungiu óunigirubalina

ani úati marichaü lidan.