1 Nubungiute, Nubungiute,

ka san uagu bígirana?

Ka san uagu miábinbubei esefurana?

Ka uagu meteni bubéi lun nayahun?

2 Nubungiute,

agúahatina bun áriebu wéyuagu, móunabuntibu;

úati emeraaguni nun!

3 Gama lumoun sándutibu

rútiña Ísüraelina uéiriguni bun lidan barúeihan.

4 Afiñetiña meha wagübürigu buagu,

hemenigitiña buagu ani aba besefuruniña,

5 amuriahatiña ídemuei buma, aba besefuruniña;

aba hafiñerun buagu ani meredetibu wuriba hama.

6 Gama lumoun mama aban wügüri au, aban héweraü au,

héheraagüle gürigia au!

7 Ha arihitina adaaguatiña bula nau;

asagaha hamutu hañeñe nun,

aba hánhinhani hachügü;

8 hariñagati:

«Ru laali lafiñen luagu Bungiu,

sefuléiti Aburemei guentó,

anhein inarüni lubéi luagu hínsiñe lan lun, salbaléigia».

9 Ani ítara liñati:

Furigüda bumutina turageirugugiñe núguchu,

emeraaguagüda bumutina taniguagu.

10 Lubaragiñebei nágurahoun,

rúatina lábugiñoun baríaahan;

lúmagiñe turageirugugiñe núguchu,

buguya Nubungiutebei.

11 Madisedabá nuéi,

ladüga madisetina luéi idiheri,

ani úati kaba lan íderaguana.

12 Geyeguaaña náganiñu nau kamá bágasu,

kamá bágasu gáñitiña ha Basangiñetiña;

13 adürürühatiña kei liñún gáñitiña,

wagatiña, aba hahunragun houngua nuagun.

14 Ítara niña keisi duna le áwiyuruti,

luguguaali súngubei nabu.

Ítara tiña nanigi nidan

kei lubuña sanudelu le arürüdaguti.

15 Mábeiha nagülerugu kei kaliki;

badüle niñeñe luagu nisielun;

bulugüda báadina chülǘ lumoun óunweni!

16 Geyegua hamaadina saragu wuribatiña le gumuti, kamá le ounli,

héirigua hamaali núhabu luma nugudi.

17 Gayaraahali nabahüdüni nabu!

Magida hamuti náganiñu harihin nuéi;

18 fánreingua hamaaru nadaüragun hádangua,

aba háhurerun ubunuruni tuagu.

19 Gama lumoun, Nabureme,

buguya le íchugubei erei nun, madisedabá!

Ñǘbuinba íderaguana lau lufuresen!

20 Sefubána luéi nounwen afarúarügü lau tamana eféin;

mígiraba lun háfarunina óunligu ha hilagubei;

21 sefubána luéi hayuma burí liñún ha;

aramudabana luéi haganchun burí bágasu ha!

22 Nadimurehaba buagu houn níbirigu,

nadimurehaba buidu buagu lidan hadamuridagun.

23 Huguya le inebehabubei lun Aburemei,

alawaha huméi!

Sun ladügawagun Hakobu ru humá uéiriguni lun!

Heremuha sun ladügawagun Ísüraeli lun!

24 Ladüga Ligía, marihin lumuti

hasufurirun gudemetiña kei ni kata

maramudagun ligía hawéi.

Aganba lumutiña dan le hamuriahan ídemuei luma!

25 Nalawahabadibu luagu bagunfulirun

lau bererun hagibugiñe saragu bumutuniña;

nagunfulirubei nani füramasei bun hagibugiñe

ha íchugubaña inebesei bun.

26 Hou humá, huguya nidiheritiña, darí hakimuledun;

halawahei Aburemei, huguya le áluahabalin,

winwan humá luagu saragu irumu.

27 Sun hawuyerigu gürigia hama sun néchanigu,

sun gürigia ha lídangiñetiña sun larigeirugu ubóu;

haritagua humá luagu Aburemei, ñübuin humá lun;

hudugua huguyame ligibugiñe!

28 Ladüga Aburemei urúeibei,

ligía agumadirubaliña néchanigu.

29 Bulugua humá, lúnrügüla háhuduragua,

sun ha rísibaña abagaridun,

sun ha lúnbaña hagiribudun lidoun kaliki,

ladüga mabagaritiña houngua.

30 Háhuduraguba sun nadügawagun lun Aburemei,

hadimurehaba luagu lidan sun habagari;

31 hadimurehaba houn ha águrahoutiña hárigiñe

luagu lúaragun luma luagu burí katei le ladügübei.