1 Ha áluahabaña haramudagun lidan Wabureme

aganóua hagía lábugiñe lamuñadina Bungiu Suntigabafu,

2 gayaraati hariñagun lun Bungiu:

«Buguya naramudaguagülebei, le óunigirubalina,

Buguya Nubungiutebei, le uágubei nemenigida!»

3 Ligíarügübei gayara lesefurunibu tuéi sádara aramudaguatu,

luma hawéi igei gáfarahatiña,

4 ladüga ladouraguba bau lau larüna,

areidañububa buidu lábugiñe larüna,

Lóunigirubadibu ligunfulin Bungiu

ageindagua ligíame báugiñe.

5 Manufudedabá luéi denchaü áriebuna,

ni tuéi gimara to achüürǘtu wéyuagu,

6 ni hawéi igei ha ñǘbuintiña úara luma luburiga,

ni luéi wuribani le áfarahati amidirugu.

7 Hábürühaba milu hilaaña luéigiñe bubaünan,

diisi milu luéigiñe bóunwenren,

gama lumoun masuseredunbei ni kata bun.

8 Ariharügü bubéi:

Barihubei hafayeiruaha wuribatiña luagu hadüga.

9 Barǘ baali lubeigia Bungiu lun baramudaguagüleme,

le Íñugubei lun lóunigirunibu

10 ligía miábinbei lubéi ni aban wuribani buagun,

machülübei giñe sandi búbiñoun.

11 Lóunahabaña lani ánheligu

lun hóunigirunibu le ñein lumuti bidin.

12 Hanügübadibu háhaburugu

luéi lachugeragun bugudi luagu dübü.

13 Gayaraabei béibugun haganagua liñún hama hewe

liñún gáñitiña hama hewe péisinitiña.

14 «Níchugubei iñun le ñein lumuti

siñá lan lachülürǘniwa lumoun,

ladüga hínsiñetina lun ani subudilána.

15 Nóunabubei danme le láwarun nun; lúmabadina!

Nesefurubei luéi idiheri,

níchuguba uéiriguni lun.

16 Níchuguba ibagari migifeti lun,

nadügüba lun lagundaarun lau nasalbahan!»