1 Dan le larufudagun Bungiu lungua,

aba hachagaragun láganiñu;

ha iyereehabúbaña lun,

aba hanurahan luéi;

2 gumuguatiña kei gumuleli garabalirugu,

rǘrüguatiña kei lubuña sanudelu wáturugu;

féridiñuhaña wuribatiña ligibugiñe Bungiu!

3 Ánhaña ha buídubaña, gúndaatiña,

buinñu haña lau ugundani ligibugiñe Bungiu,

achubahatiña lau ugundani!

4 Heremuha lun Bungiu,

heremuha uremu lun Aburemei;

alawaha huméi le agalufehabei ligibuagu dúeri,

gunda humá lidan Aburemei!

Gunda humá liñúarü!

5 Bungiu le aganóubei tidan luban to sánduboun,

ligía háguchibei méteñuhaña,

ligía ágüdahabaliña würiña ha hilaguaaña hámari;

6 ruti Bungiu fulasu houn ha

hábuguarügübaña lun haganóun ñein;

sagá lumutiña adaürǘtiña awansegüdalaña;

ánhañati ha salufuribaña haganóuba lidan múa máluleti.

7 Bungiu,

dan le báfuridunbei habá habá bumutuniña

éibugeina lidan fulasu mageirawati,

8 adadagarati múa,

áhuyati huya siélugiñe,

adadagarati Sinaí ligibugiñe Bungiu,

ligibugiñe Habungiute lánigu Ísüraeli.

9 Bungiu, áhuyagüdatibu saragu huya,

buchaali yebe hawagu bánigu,

aba bíchugun gurasu houn.

10 Rédeitiña bumutuniña ñein,

ánheinti buguya Bungiu, lau bareini,

ru bumuti le hemegeirubei gudemetiña houn.

11 Ruti Bungiu aban uganu;

saragu haña würiña ariñaguti:

12 «Hanurahaña urúeigu hau sun hasudaranigu!»

Múnada, fánreingua hamuti burí würiña katei

le agidarúbei hawéi áganiñu,

13 lenegerügaaña tarüna wagugua hóuburagu lau pülata!

Lau tiyu miriñu kei golu fínuti!

Ánheinti huguya rédeitün lidan fárüga.

14 Dan le ladügünbei Suntigabafu lun hanurahan urúeigu,

lábürühañaha niewe luagun wübü Salümón.

15 Wéiriti liñun burí láraabute Basán!

Wéiriti liñun burí luwübüri.

16 Huguya burí le aganóubei lidan wübü íñuti;

ariha humuti wübü le ñein lubéi líchigoun

Bungiu luban lau gimugaü.

Laganóuba Aburemei ñein súnwandan!

17 Luagu míñunu labahüdoun Bungiu

likarün hama ligabayun ha lánina wuribu;

tidan liabin Sinaígiñe lun lúbiñoun.

18 Bungiu, múdeitibu iñun, barüina adaürǘtiña;

ibihatibu fáyeiti hámagiñe wügüriña

íbini ha maganbadibaña

deregeguatiña houngua bun, Aburemei.

19 Alawahoualá Bungiu,

Wabungiute Wesefuragüle,

barǘ lumuti wahürügü sagü weyu!

20 Wabungiute aban Bungiu le esefuhati ligía,

le giñe gayaraabei lesefuruniwa luéi óunweni.

21 Labouchagubei Bungiu hachügü láganiñu

hachügü ha lidanmémebaña figóu.

22 Ariñagaali Aburemei:

«Nagiribudagüdübadibu Basangiñe;

nagiribudagüdübadibu lídangiñe barana huliliti;

23 lun bágawagüdüni bugudi lidan hata báganiñu

gurá hameime giñe bilügüniña ounli».

24 Bungiu, Nubungiute Nurúeite,

arihúati burí asariñaagüdüni búbiñe

le adügǘbei lau inebesei bun.

25 Ha eremuhabaña ubá ubaañanu;

ánhañati áfarutiña árigi,

würiña irahüñü amidanguonñanu áfareina panderu.

26 Alawaha huméi Bungiu!

Alawaha haméi sun lumutuniña Ísüraeli óundaragu!

27 Benhamín le amuleñein habá habá,

hau saragu ábutigu lani Hudá, Sabulón luma Nefütalí.

28 Nubungiute, arufudabéi bubafu;

derebugugüdabei le adüga báalibei wawagu!

29 Lúmagiñe tídangiñe tiñun buban to Herusalénboun,

le ñeinhin lubéi hanüga urúeigu idewesei bun,

30 badeinha lun Ehiptu,

animaalu le lídanbei maburu-agei,

badeinha houn bágasu gáñitiña,

ha ígirubaliña lílana fulasu ǘnabuguñu

lau hafuudun lun harisidun;

chagaguagüdabaña gürigia ha hínsiñehabubaña lun wuribu!

31 Hayabinba ounahóutiña Ehiptugiñe,

hiñurubei Etiopíana háhabu lun Bungiu.

32 Heremuha lun Bungiu, arúeihani ubouaguna;

heremuha uremu lun Aburemei!

33 Lun le agalufehabei siélurugu,

lidan sielu le magumuchadibei!

Aganba huméi liréin lumalali, umalali gabafuti.

34 Subudi huméi lubafu Bungiu;

anihein luéirigun luagu Ísüraeli,

anihein lubafu lidan sielu le díngubei.

35 Hanarimeguti Bungiu lúbiñe,

ruti Habungiute lánigu Ísüraeli

ubafu luma erei houn lánigu.

Alawahoualá Bungiu!