1 Abahüdagua lumuti sielu luéirigun Bungiu,

adimureha ligía woun luagu le ladügübei lau lúhabu.

2 Abahüdaguati aban weyu lun le aban

luagu uéiriguni ligia;

águyuguagüdalei aban áriebu lun le aban.

3 Lau sun maganbúniwa lan burí dimurei,

maganbúniwa ligía umalali,

4 éibuga lumuti dimurei ligía sun ubóu,

chülǘ lumoun lagumuhóun larigeirugu ubóu,

darí lumoun le ñein tubéi luban weyu.

5 Gumeseti weyu éibugei lémeri

lau ugundani kei aban géibaaguaditi,

kei aban adari le áfuridubei

lídangiñe rumu lánina lamarieidun.

6 Láfurida weyu luéigiñe aban louba sielu,

aba lagararaagun darí lachülürün luagun le aban oubaü,

úouga ni kata lun lanurahan luéi lisü.

7 Suruti larufudahan Aburemei,

ladüga ruti ibagari le iseriti.

Úaraguati lugumadin Aburemei

ladüga chúgüdati hau gürigia ha ǘnabugubaña.

8 Richaguati buriti lilurudun Aburemei,

ladüga barüti ugundani tun anigi.

Harumati lugumadin Aburemei,

ani harugoungadagüda lumuti agu.

9 Harumati linebenwa Aburemei,

rédeiti lun súnwandan.

Inarüniti burí lererun Aburemei,

ani richati súngubei;

10 gebegiti sügǘ lau golu le fínuti!

Bime ligía sügǘ lau sírudu le lídangiñeti mábadiga!

11 Eweridihani giñe burí ligía nun au le bubuein,

ani buiti nun lun nafalaruni.

12 Ka gefenbei luagu bulíeiguaü le guánarügü ladügübei?

Nabureme, ferudunabana luagu wuribati

le nadügübei ibidiñounga nun!

13 Gidabei anaaguni unguaü nuéi;

mígiraba lun ladügüni pantaü le labusenrun nau.

Ítara luba aban nan gürigia harumati,

sefu aume giñe luéi óunwenbu figóu.

14 Buidulá nererun luma nisaminan ligibugiñe bagu,

buguya Nabureme le esefurubalina, le naramudaguagüle.