1 Fuleseiwatiña ha haritaguabaña

hawagun ha mérebaña hama ha gudemebaña,

lesefurubaña Aburemei lidan lidere dan.

2 Lóunigirubaña Aburemei,

líchuguba ibagari luma lubuidun dan houn ubouagu,

mígirun lubaña Bungiu lun hadügüni háganiñu le habusenrun hau.

3 Danme le gabanarugu hamá lau sandi;

lasansirubei Bungiu hasandi lun átuadime!

4 Ariñagaadina:

«Nabureme, gudemená bun;

agaranihabá nun lau sun afigouhaadina lan bigibugiñe».

5 Ayumaha hamuti náganiñu luriban-agei burí katei nun hariñagati:

«Ídaame san lounwe, maritawagún láamuga luagun?»

6 Ñǘbuintiña arihana,

ani mama lau taruman hanigi;

areida hamuti sun le wuribabei lidan hachügü,

dan le háfuridun ǘmadarugun aba habahüdaguni,

7 óundaraguatiña ha iyereehabúbaña nun adimureha nuagu;

haritaguatiña luagu nasufuriruña lan ladüga nidurun.

8 Hariñagati:

«Sandi le luágubei lúmagiñeti Mafia;

ábürühaali gabanarugun ani másaarundigiaali».

9 Íbini létima meni numada

le meha yebe uágubei nemenigida,

léñaha éigibei numa, garabagua nuagun.

10 Buguyati Nabureme,

gudemená bun; areidaguagüdabana

fayei náamugaña lau le hadünabei.

11 Magañeirun habadina náganiñu

lauba katei le nasubudirei

anhein gunda bubéi nau.

12 Auti, le abagaridaalibei aban ibagari harumati

barübana búhaburugu!

Kipubána biñuarürugu súnwandan!

13 Alawahoualá Wabureme le Lubungiute Ísüraeli,

guentó luma súnwandan ítarala!