1 Aburemei, haritaguabá luagun Dawidi

luma luagun burí sun lidiheri;

2 haritaguabá luagu áfiñuruni le ladügübei bun,

Lubungiute Hakobu:

3 «Mebelubadina tidoun muna,

marounrunbadina emeraagua;

4 mámurudun nubéi nagu,

marumugunbadina ni murusun,

5 darí nadarirun muna lun Aburemei gabafuti;

Le Lubungiute Hakobu».

6 Belén waganba ladimurehoun

tuagu bágüsi lánina daradu,

darí wamutu áraabu Haarü.

7 Keimoun tidan lisanduariun Aburemei!

Hudugua wamá ligibugiñe lebu lugudi!

8 Saraba Aburemei tau bubagüsin to gabafuboun,

ñǘbuinba lidoun wübü le ñeinba lubéi bemeraagua.

9 Daügua hamá bufadirinigu lau irichaü;

wagua hamá ha gúnfulibaña buma lau ugundani.

10 Luagu lugudemen Dawidi bun;

mágurabei urúei le banúadirubei.

11 Adügati Aburemei aban áfiñuruni deregüdati lun Dawidi,

aban áfiñuruni le lunbei lagunfulirubei lan:

12 «Nañuuragüdüba aban hádangiñe badügawagun

luagu lálana barúeihan,

ánhaña agunfulira birahüñü lau nidaradun,

luma lau gumadi le lunbei narufudahani houn,

hañuuruba giñe hasaanigu

luagu lálana barúeihan lun súnwandan».

13 Anúadira laali Aburemei wübü Sión!

Anúadira laali lun laganóun ñein!

14 Anihán wübü le ñein lubéi nabusenra nerederun súnwandan,

ñeinba naganóua, ladüga ítara liña nabusenruni.

15 Nabinirubei éigini le ñeinbei saragu,

nagidarubei halama gudemetiña ha ñéinbaña.

16 Nadaüraguagüdübaña lufadirinigu lau esefuruni,

nagúaraguagüdübaña ha gúnfulibaña luma lau ugundani.

17 Neseridaguagüdübei lubafu Dawidi ñein;

aransedina aban igemeri lun urúei le nanúadirubei.

18 Nabuinchagüdübaña láganiñu lau busiganu,

ánheinti ligía, nadouragubei lau arugoungani.