1 Seremei wamutibu, Bungiu,

teinki wamutibu;

wa wamuti biri,

eremuha wagía luagu burí katei le badügübei.

2 Lariñahare Aburemei:

«Danme lachülürün dan le nabusenrun,

naguseragüdüba lau ísuruni.

3 Dan lánhingichun ubóu hau sun lílana,

au ágüdahabalin lebu deregüdagu».

4 Nariñahare houn pántatiña hama wuribatiña:

«Miñun lan hanaagun hungua mapantan huguyame;

5 maweirinlá hanaagun hungua luagu hubafu

maweirigun ligíame haritagun huouguoun dan le hadimurehan».

6 Mama luéigiñe oubaü le labouchagüle weyu

ni luéigiñe le lálüdagüle liabin aguseruni,

ni luéigiñe nórute, ni luéigiñe suru;

7 Bungiu ligía aguseragüdübei;

ǘnabugüda lumutiña híbiri, iñuragualaña híbiri.

8 Anihein aban kopu lúhaburugu Bungiu,

buin tau diwéin héretu to lánina ligañi Bungiu,

danme le léserunu diwéin,

hátuboun wuribatiña ha ubouagubaña

darí lagumuhóun tédederun.

9 Au nadimurehaba luagu Lubungiute Hakobu súnwandan,

neremuhaba giñe lun,

10 ladüga lagünrinchagubei hapantan wuribatiña,

gama lumoun laganwoundagüdübei habafu gürigia ha buídubaña.