1 Nalawahabei Nabureme tau sun nuani!

Ma lanarime bueirin, Nabureme, Bungiu!

Dáüguaadibu lau uéiriguni luma arugoungani;

2 daruguaadibu baugua tau aban manda lautu larugounga.

Tulegua bumuti sielu kei aban belu!

3 Derebugugüda bumuti tuágaburi

buban lóugiñe duna, yágüta iñun!

Adüga bumuti dúeri lun bikarünme;

áhamahatibu lidan larüna garabali!

4 Adüga bumuti garabali lun bóunagüleme,

adügabéi ligemeri watu lun leseriwidunibu.

5 Ru bumuti múa luagu lebu,

lun mánhingichun lan lídangiñe lubara.

6 Daruguati buga barana huliliti lau múa

kamá hamuga aban daüguaü

darugua ligía duna lau wübü.

7 Gama lumoun aba badeinhan lun, aba lidin;

aba léibaagun dan le laganbuni bumalali

libe lumalali wayuhuru.

8 Amudeireina luagun wübü,

ararireina lidoun fulasu wayati,

aba lidin le ñeinhin lubéi bóunahei,

9 lidoun leben le uágubei bariñaga lun mánhiñuragunlani,

lueiya ladouragun lau múa.

10 Óunaha bumuti burí duna ñéingiñe lubéi láhücha

lidoun burí lirahüñü duna le éibaagubei wǘbüwagu.

11 Lídangiñe duna ligía hata animaalugu áraabuna;

lau hagidarei burigü áraabuna hamagürabu.

12 Adaaguatiña dunuru hádibu laru duna,

eremuhatiña ñein, labadinagua tilimun wewe!

13 Buguya áturagubalin sagadi,

tídangiñe buban yágüta iñun;

gufurumagüda bumuti múa lau duna siélugiñe.

14 Wéinamugüda bumuti sagadi lun heigin animaalugu,

luma nadü le lábunagubei gürigia

lun libihini leigin lídangiñe múa,

15 éigini le íchugubei erei lun;

diwéin to agundaaragüdübalin libagari,

mirigüdatei ligibu sügǘ lau garaba.

16 Áfara tumuti burí tídibu wewe tumagürabu,

hibúari Líwanuna to lábunaguboun Aburemei.

17 Adügatiña hañübürin-agei dunuru hádibu tuagu;

luagu burí lídibu gudi haganóua yábura.

18 Lidan burí áraabu le íñuti,

ñéinñanu gábara,

labadinagua burí dübü,

ñein haramudagua másaraga.

19 Adüga bumuti hati lun lamisurahani dan;

subuditi lidaani lálüdün weyu lun.

20 Tulé bumutu manda búrigatu to lánina áriebu,

ligíati háfuridun animaalu áraabuna.

21 Adürürühatiña liñún hárigi háliru;

amuriahatiña luma Aburemei lun líchuguni heigin houn.

22 Gama lumoun dan le láfuridun weyu,

aba houdin arounra lidan hamasa.

23 Ligíati láfuridun gürigia adügei luadigimari,

aba luadigimaridun darí laguñeedun.

24 Gíbeti burí katei le adüga báalibei Aburemei!

Lau lichú aau badügei súngubei;

arihúati sun katei le badügübei lidan sun fulasu!

25 Anihán barana, dabubere liña ani migife ligía,

añahein saragu animaalugu lidan

darí lun siñá lan habahüdǘniwa,

wéinamutiña hama ñǘbüritiña.

26 Áfayahatu burí waporu ñein,

anihein Lewiatán ñein,

animaalu baranahana le badügübei lun láhurerun lidan.

27 Sun hagía agurabahatiña

lun bíchuguni heigin houn lidan lidaani.

28 Rútibu houn, aba habudahan;

dará bumuti búhabu,

aba habuinchun lau lubuidun-agei;

29 anhein baramuda bigibu, aba hanufudedun,

ánhabu míchugun awaraguni houn,

aba hóunwegun ábaya hasaliragun kalikime.

30 Gama lumoun anhein bóunaha báfurun le lánina ibagari,

aba hagibedagun aba iserigua lan larihíniwa múa.

31 Magumuchaditi luéirigun Aburemei!

Gúndaati Aburemei lau burí katei le ladügübei!

32 Adadagarati múa dan le larihin Bungiu luagun;

ígiragüdati burí wübü gumuleli dan le laguuruni!

33 Neremuhaba lun Nabureme sun wínwangidina lan,

neremuhaba lun Nubungiute lidan sun nibagari.

34 Labusenradügü hamuga Nabureme lagundaarun lau nisaminan

ladüga lídanrügüñein nadarirei nugundan.

35 Gumugua hamá gafigountiña ligibuagugiñe ubóu!

Gumugua hamá salufuritiña!

Nalawahabei Nabureme tau sun nuani!

Alawahoualá Aburemei!