1 Gudemená bun, Nubungiute,

gudemená bun,

ladüga bidan náluaha naramudagun.

Busentina naramudagun lábugiñe barüna

darí lásügürün denchaü.

2 Nagúahabei Bungiu le Íñugutimabei,

ligía Bungiu le íderagubalina lidan sun katei.

3 Lóunahabei línsiñehabu luma linarün siélugiñe,

ábame lesefurunina hawéi ha éibaahabalina lau igañi.

4 Geyegu haña áganiñu nau,

busentiña héiginina kei liñún gáñitiña;

ítara liña hari kei arufun tuma gimara;

ítara tiña hañeñe kei aban eféin hamanatu.

5 Nubungiute, lóugiñeñadibu sielu;

buin liña sun ubóu lau buéirigun!

6 Sétitiña náganiñu aban sádara nubá lun hábürügüdünina;

chigatiña aban huyu lubá nugudi,

gama lumoun hagía guánarügü éiguadubaña lidoun.

7 Aranseñutiña nanigi, Nubungiute;

aranseñutiña nanigi lun teremuhan uremu bun.

8 Agaguduabá nuani;

agagudúa humá, sun tuwuyeri árüpa;

nagaguduba binaafingiua!

9 Nabureme nalawahabadibu lau uremu,

haganagua gürigia hama burí néchanigu.

10 Ladüga wéiriti bínsiñehabu chülǘ sielu,

chülüti binarün chülǘ lumoun sielu le díngubei.

11 Nubungiute lóugiñeñadibu sielu;

buin liña sun ubóu lau buéirigun!